Тадбиркорни чув туширган солиқчи: Жиззахдаги тезкор тадбир тафсилотлари

Бош прокуратура ҳузуридаги Иқтисодий жиноятларга қарши курашиш департаментининг Жиззах вилояти бошқармаси томонидан навбатдаги тезкор тадбир ўтказилди. Унда фуқароларнинг ишончига кириб, тадбиркорлардан ноқонуний пул талаб қилаётган мансабдор шахснинг қонунга зид хатти-ҳаракатлари фош этилди.

Жиззах шаҳар солиқ инспекциясининг давлат солиқ бош инспектори Х.Ш. хизмат ваколатидан фойдаланиб, якка тартибдаги тадбиркорни босим остига олиш ва фирибгарлик йўли билан пул ўзлаштиришга уринган.

«Қарзни йўқ қилиб бераман»: Солиқчининг найранги

Тезкор суриштирувлар давомида аниқланишича, инспектор тадбиркорнинг қонуний мажбуриятларини сохталаштириб, ўз манфаатига хизмат қилдирмоқчи бўлган:

• Сунъий рақамлар: Солиқ инспектори якка тартибдаги тадбиркор Т.М.нинг амалда бор-йўғи 1,4 миллион сўмлик солиқ қарздорлигини гўёки 17 миллион сўм деб кўрсатган;

• Таҳдид ва босим: Агар тадбиркор ушбу «қарз»ни тўламаса, масалани юқори идораларга етказиб, унга нисбатан чора кўрилиши билан қўрқитган;

• «Хизмат ҳақи» — 9 миллион сўм: Сўнгра ушбу қарздорликни юқори лавозимларда ишловчи танишлари орқали базадан «йўқ қилиб бериш»ни ваъда қилиб, 9 миллион сўм талаб қилган.

Инспекция биноси олдидаги тезкор қўлга олиш

Департамент хабарига кўра, инспектор Х.Ш. талаб қилган пулларнинг 2 миллион сўмини олдиндан фирибгарлик йўли билан қўлга киритган:

• Ашёвий далил: Қолган 7 миллион сўмни Жиззах шаҳар солиқ инспекцияси маъмурий биноси олдида олаётган вақтида тезкор ходимлар томонидан ашёвий далиллар билан ушланди;

• Жиноят иши қўзғатилди: Мазкур ҳолат юзасидан Ўзбекистон Республикаси Жиноят кодексининг 168-моддаси (фирибгарлик) билан жиноят иши қўзғатилди.

Ҳозирда ушбу ҳолат бўйича дастлабки тергов ҳаракатлари олиб борилмоқда.