Фото: Видеодан кадр
Бухоро шаҳридаги тунги клублардан бирида ўтказилган тезкор тадбир жамиятни ларзага соладиган жиноятни очиб ташлади. Бухоро вилояти Ички ишлар бошқармаси, прокуратура ҳамда Давлат хавфсизлик хизмати ходимлари ҳамкорлигида амалга оширилган операция натижасида одам савдоси, аёл-қизларни мажбурий меҳнат ва фоҳишаликка тортиш билан шуғулланган жиноий тузилманинг фаолияти фош этилди.
Тергов маълумотларига кўра, ушбу тунги клуб раҳбари — муқаддам безорилик билан боғлиқ жиноят учун судланган шахс бўлган. У Instagram орқали республиканинг турли ҳудудларидан ишсиз, оғир ижтимоий аҳволдаги ва ҳимояга муҳтож аёл-қизларни “танлаб”, уларга баланд маош, енгил иш ва “раққосалик” фаолиятини ваъда қилган. Шу баҳонада уларни Бухоро шаҳрига олиб келган.
Бироқ воқеалар бундан кейин мутлақо бошқа йўналишга бурилган. Қайд этилишича, қизларнинг эркинлиги чекланган, уларга нисбатан руҳий босим, жисмоний таҳдид ва қўрқитишлар қўлланган. Энг оғири — тунги клуб мижозлари билан жинсий алоқа қилишга мажбурлаш ҳолатлари қайд этилган. Жабрланувчилар ишлаб топган пуллар эса клуб раҳбари томонидан мажбурий тарзда тортиб олинган. Айрим ҳолатларда тан жароҳати етказилгани ҳам маълум қилинмоқда.
Тезкор тадбир вақтида клубда фаолият олиб борган жами 23 нафар аёл-қиз Бухоро шаҳар ички ишлар органларига олиб борилган. Ҳозирда тунги клуб раҳбарига нисбатан Ўзбекистон Республикаси Жиноят кодексининг 135-моддаси 2-қисми билан жиноят иши қўзғатилиб, унга нисбатан қамоқ эҳтиёт чораси қўлланган. Клуб ишини юритувчилар ва ушбу ноқонуний схемага алоқадор бошқа шахсларга нисбатан эса терговга қадар текширув ишлари олиб борилмоқда.
Бухоро вилояти Ички ишлар бошқармаси эса фуқароларни ижтимоий тармоқлардаги “енгил иш”, “юқори маош”, “тез пул” каби жозибали эълонларга ишониб қолмасликка чақирди. Чунки бундай “ширин таклифлар” ортида одам савдоси ва эксплуатацияга қурбон бўлиш хавфи бўлиши мумкин. Шунингдек, ёшларнинг ижтимоий тармоқларда кимлар билан ёзишма қилаётгани, қайси аккаунтлар билан алоқага киришаётгани бўйича ота-она ва яқинлар назоратини кучайтириш тавсия этилди.
Хулоса битта: интернетдаги ҳар бир “баланд маошли таклиф” — имконият эмас, баъзан тузоқ бўлиши ҳам мумкин. Эҳтиёт бўлиш — айб эмас, ҳаётни сақлаб қоладиган энг тўғри қарор.
“Zamin”ни Telegram'да ўқинг!
