Тошкент вилояти Қибрай туманида коррупция билан боғлиқ навбатдаги ҳолат фош этилди. Маълум қилинишича, туман ҳокимининг тадбиркорликни ривожлантириш, аҳоли бандлигини таъминлаш ва камбағалликни қисқартириш масалалари бўйича маҳалла фуқаролар йиғинидаги ёрдамчиси катта миқдордаги пулни олаётган вақтида қўлга тушган.
Терговга оид маълумотларга кўра, у МФЙ биноси ёнида жойлашган, давлат захирасида турган 4 сотих ер майдонини “расмийлаштириб бериш”ни ваъда қилган. Айтилишича, ушбу ерни ҳокимликда ишловчи танишлари орқали архив ҳужжатларига сохта маълумотлар киритиш йўли билан харидор номига ўтказиб беришни режалаштирган.
Бу “хизмат” эвазига у 50 минг АҚШ доллари талаб қилган. Давлат хавфсизлик хизматининг Тошкент вилояти бўйича бошқармаси ҳамда Иқтисодий жиноятларга қарши курашиш департаменти ходимлари томонидан ўтказилган тезкор тадбирда гумонланувчи талаб қилинган маблағнинг 10 минг АҚШ долларини олган пайтда ашёвий далиллар билан ушланган.
Ҳолат юзасидан унга нисбатан Жиноят кодексининг 168-моддаси 4-қисми “а” банди ҳамда 28, 211-моддаси 3-қисми “а” банди билан жиноят иши қўзғатилган. Ҳозирда тергов ҳаракатлари олиб борилмоқда.
Қисқаси, “ерни ҳал қилиб бераман” деган гапнинг ортида кўпинча катта таваккал туради. Агар кимдир сиздан “ҳужжатни тез қиламан” деб пул сўраса — бу аллақачон сигнал: қонун йўлини танлаш энг тўғри ва энг хавфсиз вариант.
“Zamin”ни Telegram'да ўқинг!
