Олий таълим, фан ва инновациялар вазирлигининг масъул ходими коррупция жинояти устида қўлга олинди. Таълим ташкилотларини лицензиялаш бўлими етакчи мутахассиси ўз лавозимидан фойдаланиб, ноқонуний даромад орттиришга уринган.
Аниқланишича, гумонланувчи Қарши шаҳридаги нодавлат олий таълим муассасаларидан бирининг Сурхондарё вилоятида филиал очишига рухсат берувчи лицензияни тез фурсатда ижобий ҳал қилиб беришни ваъда қилган. Бунинг эвазига у университет вакилидан 100 минг АҚШ доллари миқдорида пора талаб қилган.
Давлат хавфсизлик хизматининг Қашқадарё вилояти бўйича бошқармаси ходимлари томонидан ўтказилган тезкор тадбир давомида вазирлик мутахассиси Тошкент шаҳрида келишилган пул маблағини олаётган вақтида ашёвий далиллар билан ушланган. Ҳозирда мазкур ҳолат юзасидан тегишли тартибда жиноят иши қўзғатилиб, тергов ҳаракатлари олиб борилмоқда.
“Zamin”ни Telegram'да ўқинг!
