Наманган шаҳрида яшовчи, 1984 йилда туғилган шахс «Ҳаж-2026» мавсумида фуқароларни ноқонуний йўллар орқали Саудия Арабистонига юборишни ваъда қилиб, катта миқдорда пул талаб қилгани учун ҳуқуқни муҳофаза қилувчи органлар томонидан қўлга олинди.
Текширув маълумотларига кўра, у Чуст туманида яшовчи 4 нафар фуқарога ҳаж сафарини ташкил қилиш эвазига 26 минг АҚШ доллари сўраган. Бу маблағ эса «хизмат» сифатида кўрсатилган.
Тезкор тадбир Давлат хавфсизлик хизмати ҳамда Иқтисодий жиноятларга қарши курашиш департаменти ходимлари ҳамкорлигида амалга оширилди. Жараён давомида гумонланувчи 6 минг доллар пулни қабул қилаётган вақтда ашёвий далиллар билан ушланган.
Ҳолат бўйича унга нисбатан Жиноят кодексининг 168-моддаси — фирибгарлик аломатлари асосида жиноят иши қўзғатилган. Ҳозирда дастлабки тергов ҳаракатлари давом эттирилмоқда.
Расмий маълумотларга кўра, «Ҳаж» зиёратини ташкил этиш фақат давлат томонидан белгиланган тартиб асосида амалга оширилади. Бу жараён Дин ишлари бўйича қўмита ва Саудия Арабистонининг ваколатли идоралари ўртасидаги келишувлар асосида йўлга қўйилган.
Шунингдек, зиёратчиларни юбориш фақат Ўзбекистон мусулмонлари идораси орқали амалга оширилади. Норасмий шахслар ёки хусусий ваъдалар орқали ташкил этилган сафарлар қонунга тўлиқ зид ҳисобланади.
Қисқаси, мутасаддилар аҳолини бундай алдов ва фирибгарлик ҳолатларидан эҳтиёт бўлишга чақирмоқда. Ҳаж каби муқаддас амаллар фақат расмий ва ишончли йўллар орқали амалга оширилиши шарт.
“Zamin”ни Telegram'да ўқинг!
