Банкларда Сунъий интеллект маслаҳатчиси платформаси ишга туширилади
Ўзбекистонда банк тизимини трансформация қилиш ва кредитлар самарадорлигини ошириш мақсадида «Сунъий интеллект маслаҳатчиси» платформаси ишга туширилади. Ушбу тизим тадбиркорлар учун лойиҳа рисклари ва бозордаги талабни таҳлил қилиб, тайёр бизнес ечимларини тақдим этади. Шу билан бирга, туман даражасидаги банк ходимларини сунъий интеллект технологиялари билан ишлашга ўқитиш орқали янги иш ўринлари яратиш кўламини кенгайтириш вазифаси белгиланди.
Ўзбекистон Президенти Шавкат Мирзиёев раислигида ўтказилган йиғилишда банк тизимини трансформация қилиш ва ҳудудларда тадбиркорликни қўллаб-қувватлаш масалалари муҳокама қилинди. Давлат раҳбари глобал зиддиятлар кучайган ҳозирги шароитда раҳбарлар иш услуби ва дунёқарашини мутлақо ўзгартириши зарурлигини таъкидлади. Биринчи чоракдаги ижобий кўрсаткичлар хотиржамликка сабаб бўлмаслиги қайд этилди.
Жорий йилда банклар орқали кичик ва ўрта бизнесни ривожлантириш учун 140 триллион сўм маблағ йўналтирилмоқда. Таҳлилларга кўра, Ширин ва Учқудуқ каби ҳудудларда ҳар 1 миллиард сўм кредит ҳисобига 17-20 тагача иш ўрни яратилган бўлса, Учкўприк, Пискент ва Бўстонлиқ туманларида бу кўрсаткич бор-йўғи 3 тани ташкил этмоқда. Кредитлар самарали лойиҳаларга йўналтирилганда қўшимча 36 мингта янги иш ўрни яратиш имконияти мавжудлиги кўрсатиб ўтилди.
Соҳа масъулларига банкларда «Сунъий интеллект маслаҳатчиси» платформасини жорий этиш топширилди. Ушбу тизим тадбиркорлар учун лойиҳа параметрлари, рисклар ва бозордаги талабни таҳлил қилиб, тайёр ечимлар тақдим этади. Шунингдек, туман даражасидаги банк ходимларини сунъий интеллект технологиялари билан ишлашга ўқитиш вазифаси белгиланди. Бу орқали кредит ресурсларини энг юқори самара берадиган лойиҳаларга йўналтириш мақсад қилинган.
Изоҳлар 0
…