Ўзбекистон Адлия вазирлиги ҳузуридаги Интеллектуал мулк маркази Тошкент шаҳрида контрафакт маиший кимё маҳсулотлари сотилиши юзасидан бир нечта маъмурий иш қўзғатди. Мазкур чора-тадбирлар "KROT" тозалаш воситалари бренди эгаси бўлган "Сано Течнологй" компаниясининг мурожаати асосида амалга оширилди. Бу ҳақда Spot.uz хабар беради.
Ҳуқуқ эгасининг маълумотларига кўра, пойтахтдаги бир қатор савдо нуқталарида унга тегишли товар белгисига ўхшаш номлар остида сохта маҳсулотлар таклиф қилинган. Вазирлик ходимлари томонидан ўтказилган текширувлар давомида 6 та жойда контрафакт товарлар сотилаётгани тасдиқланди. Ҳолат юзасидан барча қоидабузарларга нисбатан Маъмурий жавобгарлик тўғрисидаги кодекснинг 177-моддаси, яъни ўзганинг товар белгисидан қонунга хилоф равишда фойдаланиш бўйича баённомалар расмийлаштирилди.
Суд кўриб чиқиши натижаларига кўра, олтита фирманинг ҳар бирига базавий ҳисоблаш миқдорининг 15 баравари, яъни 6,18 млн сўм миқдорида жарима тайинланди. Умумий жарима миқдори 37 млн сўмдан ошди. Шунингдек, тадбиркорларга аниқланган қонунбузарликларни бартараф этиш мажбурияти юкланди.
Адлия вазирлиги ўз бренд ҳуқуқлари бузилишига дуч келган тадбиркорларни 1008 ишонч телефони ёки электрон почта орқали хабар беришга чақирди. Аввалроқ суд томонидан "Ҳуго Босс" ва "Томмй Ҳилфигер" брендларининг контрафакт нусхаларини сотганлардан 111 млн сўм ундириш ҳақида қарор чиқарилган эди.
“Zamin”ни Telegram'да ўқинг!
