Meta СИ харажатлари сабаб 8 минг ходимни бўшатади
Meta компанияси сунъий интеллект соҳасига йирик инвестициялар киритиши муносабати билан 8 минг нафар ходимини ишдан бўшатишини эълон қилди. Жорий йилда ушбу соҳага 135 миллиард доллар сарфлашни режалаштирган корпорация раҳбари Марк Цукерберг сунъий интеллект иш унумдорлигини ошириб, катта жамоалар ўрнини боса олишини таъкидлади. Мазкур жараён доирасида нафақат ходимлар қисқартирилади, балки аввал режалаштирилган минглаб бўш иш ўринлари ҳам бекор қилинади. Бу каби оммавий ишдан бўшатишлар ҳозирда Amazon, Oracle ва Microsoft каби бошқа йирик технологик гигантлар орасида ҳам кузатилмоқда.
АҚШнинг "Meta" технологик компанияси ўз ходимларининг қарийб 10 фоизини ёки 8 минг кишини ишдан бўшатиш ниятида эканини маълум қилди. "Facebook", "Instagram" ва "WhatsApp" ижтимоий тармоқлари эгаси бўлган корпорациянинг ушбу қарори сунъий интеллект технологияларига киритилаётган йирик инвестициялар билан боғлиқ. Бу ҳақда Bbc.com хабар беради.
Компания раҳбарияти ходимларга режалаштирилган қисқартиришлар ҳақида хабар берган. Шунингдек, аввалроқ ишга қабул қилиш кўзда тутилган бир неча мингта вакансия ҳам бекор қилинадиган бўлди. Қисқартиришларнинг асосий сабаби сифатида сунъий интеллектни ривожлантириш учун сарфланаётган улкан маблағлар кўрсатилмоқда. Фақат жорий йилнинг ўзида ушбу соҳага 135 млрд доллар сарфлаш режалаштирилган.
Компания асосчиси Марк Цукерберг сунъий интеллект ходимларнинг иш унумдорлигини оширишга ёрдам берганини таъкидлади. Унинг сўзларига кўра, эндиликда бир киши илгари катта жамоа талаб қилинган лойиҳаларни амалга ошириши мумкин. Цукерберг 2026 йил сунъий интеллект иш жараёнларини тубдан ўзгартирадиган davr бўлишини башорат қилмоқда.
Маълумот учун, 2022 йилдан буён "Meta" ўн минглаб ходимларини бўшатиб келмоқда. Технология соҳасидаги бошқа гигантлар ҳам шундай йўл тутмоқда. Хусусан, "Amazon" 30 мингдан ортиқ, "Ораcле" эса 10 мингдан зиёд ходимини қисқартирган. "Microsoft" компанияси ҳам узоқ йиллик тажрибага эга ходимларга тўловлар эвазига ўз хоҳиши билан ишдан кетишни таклиф қилган.
Изоҳлар 0
…