Фото: Yandex
Ташқи реклама ва ёзувларни жойлаштириш тартиби тадбиркорлар манфаатидан келиб чиқиб қайта кўриб чиқилмоқда. Бу ҳақда Рақобатни ривожлантириш ва истеъмолчилар ҳуқуқларини ҳимоя қилиш қўмитаси маълум қилди.
Қайд этилишича, “Ташқи ёзувларни тартибга солиш тўғрисида”ги низом лойиҳаси ишлаб чиқилган бўлиб, унда амалиётда учраётган тушунмовчиликлар ва ҳуқуқий бўшлиқларга аниқлик киритиш кўзда тутилган.
Ҳужжатга кўра, “ташқи ахборот воситаси”, “ташқи ёзув”, “пешлавҳа” каби тушунчаларга аниқ таъриф берилади. Энг муҳим янгиликлардан бири — пешлавҳалар реклама сифатида баҳоланмаслиги мумкин.
Яъни, савдо, умумий овқатланиш ёки хизмат кўрсатиш объектларида ташкилот номи ва фаолият турини кўрсатувчи ёзувлар реклама ҳисобланмайди. Шу сабабли, улар учун алоҳида рухсатнома олиш ёки тўловларни амалга ошириш талаби бекор қилиниши мумкин.
Шу билан бирга, тижорат мақсадидаги реклама материаллари аввалгидек алоҳида тартиб асосида назорат қилинади. Қўмита реклама мазмунининг қонунчиликка мослигини кузатишда давом этади.
Мазкур лойиҳа жамоатчилик муҳокамасига қўйилган бўлиб, 10 майга қадар таклифлар қабул қилинади. Мутасаддилар барча тадбиркорлар ва фуқароларни ушбу жараёнда фаол иштирок этишга чақирмоқда.
“Zamin”ни Telegram'да ўқинг!
