Олий таълим муассасаларида педагогика йўналишида сиртқи бўлимлар очилади (+ОТМлар рўйхати)

  • 09 август 2017, 18:07
  • 34 921
  • Жамият
  • Олий таълим муассасаларида педагогика йўналишида сиртқи бўлимлар очилади (+ОТМлар рўйхати)
    9 август куни Президент "Олий таълим муассасаларида педагогика йўналишида махсус сиртқи бўлимларни ташкил этиш тўғрисида"ги қарорни имзолади, деб ёзмоқда Uz24 сайти.

    Ҳужжатга кўра, 2017/2018 ўқув йилидан бошлаб олий таълим муассасаларида педагогика йўналишлари бўйича махсус сиртқи бўлимлар ташкил этилади.

    Белгиланишича:

    олий таълим муассасалари таркибида ташкил этилган махсус сиртқи бўлимларнинг бакалавриат таълим йўналишларига қабул ўрта махсус, касб-ҳунар маълумотига ҳамда камида уч йил педагогик амалий иш стажига эга бўлган, мактабгача, мактаб ва мактабдан ташқари таълим муассасалари эҳтиёжлари асосида тасарруфида ушбу таълим муассасалари мавжуд бўлган вазирликлар ва идоралар томонидан бериладиган тавсияномага эга педагог кадрлар ҳисобидан амалга оширилади;

    махсус сиртқи бўлимда ўқиш тўлов-контракт асосида амалга оширилади. Таълим йўналишлари бўйича битта талабани бир йиллик ўқитиш қийматини аниқлаш белгиланган тартибда амалга оширилади;

    махсус сиртқи бўлимда ўқиётган талабаларга имтиҳонлар, синовлар топшириш, диплом, курс, лаборатория ва бошқа ўқув ишларини бажариш вақтида уларнинг ойлик маошлари асосий иш жойида сақланган ҳолда бир ўқув йилида икки марта бир ойдан ўқув таътиллари берилади. Бунда, ўқув таътиллари қоида тариқасида умумтаълим муассасаларидаги қишки ва ёзги таътил вақтига тўғри келган даврда берилади ва уларга белгиланган тартибдаги йиллик меҳнат таътилларини бериш тартиби ҳам сақланиб қолади;

    талабаларнинг олий таълим муассасасида ўқишда бўлган даврига тўғри келадиган дарс соатлари ўқишга юборган таълим муассасасининг ўқитувчилари (ходимлари) томонидан меҳнатга соатбай ҳақ тўлаш шартлари асосида ўтилади;

    махсус сиртқи бўлим талабалари ўқишга киришда тавсиянома берувчи вазирлик ёки идора, олий таълим муассасаси ва талаба ўртасида ўқишни якунлагандан кейин тавсиянома берган ташкилот йўлланмасида кўрсатилган иш жойида (таълим муассасасида) беш йилдан кам бўлмаган муддатда ишлаб бериш мажбурияти билан уч томонлама шартнома тузилади;

    махсус сиртқи бўлимларда таълим йўналишлари хусусиятига қараб бир ўқитувчига тўғри келадиган талабалар сони нисбати қонун ҳужжатларида белгиланган нормативлар асосида белгиланади;

    олий таълим муассасасида махсус сиртқи бўлим ўқув жараёнини ташкил этишга факультет декани мақомидаги бўлим бошлиғи раҳбарлик қилади.

    Ўзбекистон Республикаси таълим муассасаларига ўқишга қабул қилиш бўйича давлат комиссиясига 2017/2018 ўқув йили учун:
    • олий таълим муассасалари махсус сиртқи бўлимларида ўқиш учун тавсиянома берувчи вазирликлар ва идоралар рўйхатини;
    • мактабгача, мактаб ва мактабдан ташқари таълим муассасалари эҳтиёжлари асосида вазирликлар ва идоралар томонидан берилган таклифларни инобатга олган ҳолда махсус сиртқи бўлимларга қабул квоталарини;
    • махсус сиртқи бўлимларга қабул қилиш тартиби ва мезонлари ҳамда
    • уч томонлама шартнома шаклини тасдиқлаш ҳуқуқи берилади.

    Келгуси ўқув йилларига қабул квоталари олий таълим муассасалари учун белгиланган тартибда белгиланади.

    Педагогика йўналишлари бўйича махсус сиртқи бўлимлар ташкил этиладиган олий таълим муассасаларида иккинчи ва ундан кейинги олий маълумот бериш сиртқи таълим шаклида ташкил этилсин, бунда иккинчи ва ундан кейинги олий маълумот олиш бакалавриат таълим йўналишининг
    2-курсидан (ўқув режалардаги фанлар фарқидан қатъи назар) камида 3 йил муддат этиб белгиланди.

    2017/2018 ўқув йили учун махсус сиртқи ва сиртқи таълимларда ўқув жараёни истисно тариқасида жорий йилнинг 1 октябридан бошланади.

    Ўзбекистон Республикаси Президентининг
    2017 йил 9 августдаги ПҚ-3183-сон
    қарорига илова

    Педагогика йўналишлари бўйича махсус сиртқи бўлимлар
    ташкил этиладиган олий таълим муассасалари
    рўйхати

    1. Низомий номидаги Тошкент давлат педагогика университети

    2. Андижон давлат университети

    3. Бухоро давлат университети

    4. Гулистон давлат университети

    5. Қарши давлат университети

    6. Наманган давлат университети

    7. Самарқанд давлат университети

    8. Термиз давлат университети

    9. Урганч давлат университети

    10. Фарғона давлат университети

    11. Жиззах давлат педагогика институти

    12. Навоий давлат педагогика институти

    13. Нукус давлат педагогика институти

    14. Қўқон давлат педагогика институти

    15. Тошкент вилояти Чирчиқ давлат педагогика институти

    Facebook орқали авторизация
    Маълумот

    Посетители, находящиеся в группе Гости, не могут оставлять комментарии к данной публикации.
    Қолдирилган фикрлар (1)

    1. Гули28 июня 2019 22:36
      9 синфни битирганлар хам кирса буладими
      0
    » » Олий таълим муассасаларида педагогика йўналишида сиртқи бўлимлар очилади (+ОТМлар рўйхати)