Сирдарёда «дабдабали» тўй. Келин-куёв трактор «белкураги»да ФҲДЁга борди (фото)

Гулистон шаҳрида яшовчи Валижон ака қайнисининг “Бир тўй қилингки, ҳали ҳеч кимники бундай дабдабали ўтмаган бўлсин, довруғи Сирдарёнинг нариги қирғоғига ҳам етсин” деган маслаҳатига кўниб, қуда томонга “Қизимни энг сўнгги русумдаги тракторда олиб кетасизлар” деб шарт қўйди.

Шундай ҳам бўлди. Қайниси томонидан ўйланган тўй сценарийсига кўра, келин–куёв ФҲДЁга бошқалар каби автомобилларда эмас, қурилиш-ободонлаштириш ишларида қўлланиладиган қимматбаҳо техниканинг “белкураги”да йўл олишди...

Аммо, аслида бу воқеа ҳаётда бўлгани йўқ. Гап шундаки, Сирдарё вилояти телерадиокомпанияси томонидан эфирга узатиб борилаётган “Сирдарёча кулги” кўрсатувининг навбатдаги “Янгича тўй” сюжетида дабдабали тўй қилиб ном чиқараман деб бошдан оёғигача қарзга ботганлар ана шундай сатира остига олинди.
"Халқ сўзи" нашри хабарига кўра, кўрсатув режиссёри Жаҳонгир Эшпўлатовнинг ушбу ижодий топилмаси жамоатчилик томонидан илиқ кутиб олинди. Энг муҳими, мазкур телетомоша юртимизда тўйларни ихчамлаштириш, дабдабабозлик ва исрофгарчиликка чек қўйиш борасида олиб борилаётган кенг кўламли тарғибот–ташвиқот ишларига қўшилган ўзига хос ҳисса бўлди.

Манба: "Халқ сўзи" «Замин» янгиликларини «Вконтакти»да кузатиб боринг