Тўй куни қабристонга борган келин-куёв кўпчиликни тўлқинлантирди

Ўзбекистонда тўй куни содир бўлган таъсирли воқеа акс этган видео ижтимоий тармоқларда кенг тарқалиб, минглаб фойдаланувчиларнинг эътиборини тортди. Унда келин ва куёв тантанага йўл олишдан аввал куёвнинг марҳум отаси қабрини зиёрат қилгани тасвирланган.

Видеода куёв отасининг қабри пойига гул қўйиб, унинг хотирасига ҳурмат бажо келтиради. Келин эса қабр олдида таъзим қилиб салом беради. Шундан сўнг улар биргаликда дуо қилиб, марҳумни ёдга олишади.

Мазкур лавҳалар ижтимоий тармоқларда илиқ муносабат уйғотди. Кўплаб фойдаланувчилар буни ота-онага бўлган чексиз ҳурмат, вафодорлик ва фарзандлик бурчининг ёрқин намунаси сифатида баҳоламоқда. Изоҳларда "ота бу дунёда бўлмаса ҳам, унинг дуоси ва хотираси фарзанд ҳаётида доимо муҳим ўрин тутади" деган фикрлар ҳам кўплаб учрамоқда.

Маълумот ўрнида, бундай анъана фақат Ўзбекистонга хос эмас. Аввалроқ АҚШ ва Нигерияда ҳам келин-куёвларнинг тўй куни марҳум ота-оналари қабрини зиёрат қилиб, уларнинг хотирасига ҳурмат бажо келтиргани акс этган видеолар ижтимоий тармоқларда кенг муҳокамаларга сабаб бўлган.