Пиёда қизни босиб кетган "Ласетти" ҳайдовчисига қандай жазо берилади? (видео)

8 октябр куни ижтимоий тармоқларда "Ласетти" автомашинасининг ҳайдовчиси йўл ҳаракати қоидасини бузиб, пиёдани устига автомашинани ҳайдаган видео тарқалгани ҳақида хабар берган эдик.

Маълум бўлишича, мазкур ЙТҲ 8 октябрь куни, тахминан соат 13.10 ларда Тошкент шаҳар, Чилонзор тумани, Чўпонота кўчасида жойлашган Goodzone савдо маркази автотураргоҳи ёнида содир бўлган.

Вестминистр университетининг 4-босқич талабаси бўлган ҳайдовчи танишига тегишли бўлган, унга ишонч қоғози орқали бошқариш учун берилган "Ласетти" русумли автомашинада автотураргоҳ бўйлаб пиёда юраётган Давлат жаҳон тиллар университети 1-инглиз филологияси факультетининг 1-босқич талабаси бўлган қизни уриб, босиб ўтган.

Содир бўлган ЙТҲ натижасида қиз бош мия лат ейиши жароҳати билан Республика шошилинч тез ёрдам илмий марказига ётқизилган. Шифокорларнинг маълум қилишича ҳозирда қиз хушсиз, бироқ аҳволи барқарор эканлиги айтилмоқда.

Ҳайдовчига нисбатан Ўзбекистон Республикаси Жиноят кодексининг 266-моддаси билан жиноят иши қўзғатилган, ҳозирда дастлабки тергов ҳаракатлари олиб борилмоқда.