Расул Кушербаевнинг «амалдорлар қиммат автомобиллар олишга зўр бериб кетган»и ҳақидаги фикрига молия вазири муносабат билдирди

^{Фото: «Дарё»}
Бундан буёғига давлат идоралари раҳбар ходимлари учун қандай автомобиль сотиб олиниши мумкинлиги аниқ белгилаб қўйилиши кутилмоқда. Бу ҳақда 18 ноябрь куни Олий Мажлис Қонунчилик палатасининг навбатдаги мажлисида Молия вазири Тимур Ишметов сўз юритди.

«Дарё» нашрининг хабар беришича, мажлисда давлат бюджети ва давлат мақсадли жамғармаларининг 9 ойдаги ижроси танқидий-таҳлилий руҳда кўриб чиқилди.

Тадбирда депутат Расул Кушербаев Молия вазирига қуйидаги савол билан юзланди:
«Маҳаллий бюджетларда орттирилган маблағнинг камида 10 фоизи жамоатчилик фикрини ҳисобга олган ҳолда турли соҳаларга йўналтирилиши керак эди. Лекин биз охирги вақтларда кўряпмизки, негадир орттирилган маблағ ҳисобидан ҳокимларимиз, бошқа ташкилотларимиз қиммат-қиммат автомобиллар олишга зўр бериб кетишди. Бу ерда жамоатчилик фикри қанчалик ҳисобга олиняпти? Ёки жамоатчилик ҳокимларимиз қиммат машина олсин деган таклифни беряптими? Бу негадир бир-бирининг мантиғига тўғри келмаяпти. Шу масала бўйича Молия вазиримизнинг нуқтаи назарини билмоқчи эдим».

Бунга жавобан Тимур Ишметов ўз муносабатини билдирди:
«Маҳаллий бюджетлар орттирилган қисмининг 10 фоизини фуқаролар фикрини эшитган ҳолда ишлатиш тартиби белгиланган. Бунинг учун Молия вазирлиги очиқ бюджет порталини ҳам ишга туширган. Иш бошланган, бизнинг фикримизча, афсуски, биз кутган даражада ижобий натижа бергани йўқ. Ҳали бу бўйича кўп ўзгаришларни қилишимиз керак.

Бу йил бўйича айтадиган бўлсак, яқинда иккинчи чорак якунини таҳлил қилдик, учинчи чоракни энди таҳлил қилмоқчи эдик. Иккинчи чоракни таҳлил қилганда орттириб бажарилган маҳаллий бюджетларга қолган қисмининг 10 фоизини, ўзида қолгани 200 млрд сўмдан ортиқни ташкил қилган бўлса, 20 млрд сўмини фуқаролар билан фикрлашиб, уларнинг фикрини олиб, ишлатиш керак бўлган. Аслида бунинг ярми, 10 млрд сўм шу йўналишда ишлатилган.

Бу йил бундай кам бўлишига сабаб – баҳорда келган пандемия натижасида ҳокимликлар маблағларнинг бир қисмини пандемияга қарши курашиш тадбирларига ишлатган: дори-дармон олиб берган, озиқ-овқат, бошқа йўналишлар, шу билан изоҳласа бўлади», — деди Молия вазири.

Ишметовнинг таъкидлашича, жамоатчилик фаоллиги ҳукумат, керак бўлса, парламентга тегишли қарор қабул қилишга туртки бўлади. Айни пайтда ишлаб чиқилаётган давлат амалдорлари қандай автомобиль сотиб олиши аниқ кўрсатиб қўйиладиган лойиҳа ҳам ҳукумат топшириғи асосида тайёрланмоқда.

«Бундай иқтисодий инқироз, пандемия пайтида маҳаллий ҳокимликлар, барча давлат идоралари харажатларини нафақат қонуний нуқтаи назардан, балки мантиқ, фуқароларнинг ҳаёт тарзидан келиб чиққан ҳолда ҳам амалга оширса, тўғри бўларди, деб ҳисоблайман. Бунга жуда ҳам танқид билан қараймиз.

Жамоатчилик фаоллиги ҳукумат, керак бўлса, парламентга тегишли қарор қабул қилишга туртки бўлади. Айнан мана шу автомобиллар мисолига келадиган бўлсак, биз ҳукуматдан топшириқ олдик. Бундан буёғига давлат идоралари раҳбар ходимлари қандай автомобиль сотиб олиши аниқ кўрсатиб қўйилади. Ҳозир Молия вазирлиги томонидан бу лойиҳа ишлаб чиқилмоқда. Насиб қилса, ҳафтанинг охиригача ишлаб чиқиш ниятимиз бор, ҳукуматга киритамиз. Бу ерда ҳар бир лавозимни қўйиб, қайси лавозимга қандай машина сотиб олиш мумкинлигини аниқ кўрсатиб қўямиз.

Агар турли вазирлик, ҳокимликлар жамоатчиликда шундай фикр пайдо бўлишига олиб келаётган бўлса, аниқ кўрсатиб қўйишга мажбур бўламиз. Ўйлайманки, давлат маблағларининг самарали ишлатилишининг якка-ю ягона йўли – биз томондан очиқликни таъминлаб бориш, жамоатчилик ва парламентдан уларнинг фикрларини эшитиб, кейин реакция қилиш», — деди Тимур Ишметов. “Замин” янгиликларини “Инстаграм”да кузатиб боринг