Депутат Расул Кушербаев 2020 йил якунлари ҳақида

Олий Мажлис Қонунчилик палатаси депутати Расул Кушербаев «Дарё» мухбири Мусулмонбек Иброҳимовга берган қисқача интервьюсида 2020 йил якунлари ҳақида ўз муносабатини билдирар экан, пандемиядек оғир шароитида туриб ҳам пул ўзлаштирган мансабдорларга алоҳида тўхталиб ўтди.

Расул Кушербаевнинг фикрича, йил давомида кўп соҳаларда бетартибликлар, жамоатчилик, фуқаролар билан давлат органлари орасида тушунмовчиликлар, зиддиятлар асаббузарликлар юзага келган ва бунинг бош сабаби пандемия оқибатида қўйилган режим ва чоралардир.

«Йил жуда оғир ўтди. Ўтган йиллар давомидаги яхши бўлмаган, ёмон томонлари билан эсда қиладиган йил бўлди, деб ўйлаяпман. Лекин йил охирида натижаларга эришиляпти. Умуман, йилнинг ўз қийинчилик йили бўлди», – деди Олий Мажлис Қонунчилик палатаси депутати.

Пандемия шароитидек қийин вақтда ҳам баъзи мансабдорларнинг ўз шароитини яхшилашга: бюджет маблағларидан қиммат-қиммат машиналар олаётганлиги, биринчи даражали бўлмаган нарсалар учун катта-катта маблағлар сарфлагани «энг ёмон сигнал» бўлди.

«Айрим мансабдорлар – ҳокимлар ҳам, ташкилот раҳбарлари ҳам шундай оғир вазиятда халқ учун туриб берадиган одамлар эмас экан. Уларда қийинчилик даврда ҳам ‘Мен қиммат машина олишим, люкс шароитда яшашим керак’, деган шахсий манфаати устунлиги аён бўлди. Бунақа одамлар билан Ўзбекистонни қуриб бўлмайди. Биз буни кўрдик, шунақалар бор экан. Биз ажратиб, кўриб олдик», – деди Расул Кушербaев.

Депутатнинг алоҳида таъкидлашича, халқ, ватан, одамлар учун туриб берамиз, деган гаплар кўпчилик мансабдорларда юзаки.

«Кимки қинғирликларга йўл қўйган бўлса, яхши шерик эмасликларини исботлаб берди. Улар исталган вақтда оёғингиздан чалиши, ишончни йўқотиши мумкин бўлган одамлар. Халқ мақолида айтилганидек, отнинг ўлими итнинг байрами бўлди. Қайтага, кўпчилик ёрдам беришга ҳаракат қилаётган бир вақтда булар бойлик орттиришга ҳаракат қилди. Яна қайтариб айтаман, бунақа одамлар билан келажакни қуриб бўлмайди! Умид қиламанки, уларнинг ким эканлигига вақти соати келиб баҳо берилади», – деди у.

Эслатиб ўтамиз, ноябрь бошида Зарбдор тумани ҳокими Зафар Рўзиев Captiva хизмат машинаси бўла туриб, 370 миллион сўмга Trailblazer, шунингдек, пандемия даврида Учқўрғон, Поп, Қўшработ ва Нарпай туманлари ҳокимликлари ҳам Trailblazer сотиб олгани тўғрисида хабар берилганди. Денов тумани ҳокимлиги эса карантин кучайтирилган пайтда — 2020 йилнинг июлида 398 миллион сўмга Trailblazer, Наманган вилояти ҳокимлиги ҳам июлда бюджет маблағлари ҳисобидан 1 миллиард 579 миллион сўмга Toyota LC200 автомобилини ҳамда сентябрь ойида қарийб 400 миллион сўмга Trailblazer русумли автомобиль харид қилган.

Бундан ташқари, Мирзачўл тумани ҳокимлиги 370 миллион сўмга Trailblazer, Қашқадарё вилояти ҳокимлиги ҳоким ўринбосарига 349 миллион сўмга Equinox, ҳокимнинг хотин-қизлар масалалари бўйича маслаҳатчисига, ёрдамчиси ҳамда ички ишлар бошқармаси бошлиғига 621 миллион сўмга 3 та Tracker хизмат машиналари сотиб олган.

Коррупцияга қарши курашиш агентлиги директори Акмал Бурҳонов мансабдор шахслар пандемия шароитида давлат маблағларининг самарали сарфланиши нақадар муҳим эканлигини тўла англаб етмаётгани, қиммат нархлардаги хизмат автотранспортларини харид қилинаётганига муносабат ҳам билдирган. Шунингдек, Президентнинг янги қарорига кўра, туман ҳокимларига нархи 267,5 миллион сўмдан юқори хизмат автомобили сотиб олиш тақиқланиши мумкинлиги маълум қилинганди. “Замин” янгиликларини “Одноклассники”да кузатиб боринг