Ижтимоий тармоқларда Эмре Кивилжим ва Юлдуз Ражабованинг 15 май куни бўлиб ўтган тўй маросимидан лавҳалар кенг тарқалиб, мухлислар эътиборини тортмоқда.
Тарқалган фото ва видеоларда ёш келин-куёвнинг бахтиёр онлар, тантананинг кўтаринки ва файзли муҳитда ўтгани яққол акс этган. Айниқса, уларнинг бир-бирига бўлган самимий муносабати ва меҳр-муҳаббати кўпчиликка манзур бўлмоқда.
Тўй маросимида кўплаб таниқли санъаткорлар иштирок этиб, байрамга алоҳида шукуҳ бағишлади. Бироқ кечанинг энг ёдда қоларли лаҳзаларидан бири — Озодбек Назарбековнинг шахсан ташриф буюргани бўлди.
Маданият вазири ёшларни самимий тилаклар билан табриклаб, меҳмонлар учун машҳур “Мендирман” қўшиғини жонли ижро этди. Ушбу жараёнда меҳмонлар ҳам қўшиқни биргаликда куйлаб, байрам янада кўтаринки руҳда давом этди.
Қўшиқ якунида Назарбеков яна бир таъсирли тилак билдириб, йиғилганларга илиқ кайфият улашди. У сўзида: “Бу кунларни анча йиллар олдин ният қилган эдик, шукрки, Аллоҳ насиб қилди. Энди яна бир ният — Жалолиддин туғиб беради худо хоҳласа”, дея таъкидлади.
Изоҳларда фойдаланувчилар бу каби самимий ва чиройли тилак айнан Юлдузга жуда мос тушганини, бундай ният энг яхши тилаклардан бири эканини таъкидлашмоқда.
Маълум бўлишича, Юлдуз Ражабова ва Эмре Кивилжим 2020 йилда биргаликда суратга олинган сериал жараёнида танишган. Унда Эмре бош қаҳрамон — Жалолиддин образини гавдалантирган бўлса, Юлдуз унинг севгилиси Қутлибека ролини ижро этган. Сериал намойишидан сўнг улар ўртасидаги илиқ муносабатлар ҳақида шоу-бизнес оламида турли миш-мишлар тарқала бошлаган эди.
Қайд этиш жоиз, жуфтлик жорий йилнинг 17 феврал куни Истанбул шаҳрида никоҳдан ўтган. Тошкентда ўтказилган тантанали тўй маросими эса аввалдан режалаштирилгани айтилган эди.
“Zamin”ни Telegram'да ўқинг!
