Ягона ижтимоий тўловни ўз вақтида тўламаган санъаткорлар лицензиясидан маҳрум қилинади

Даромадидан солиқ тўламайдиган санъаткорлар барибир пенсия ёшига етгач, давлатдан пенсия олади. Шу сабабли, улар қонунчиликка кўра ойига 1 минимал иш ҳақи миқдорида ягона ижтимоий тўловни амалга ошириб боришлари лозим бўлади.

Кун.уз билан суҳбатда «Ўзбекконцерт» концерт-томоша фаолиятини лицензиялаш бўлими бошлиғи Одилжон Абдуқаҳҳоров ушбу масалага ҳам тўхталиб ўтди:

— Хонандалар тоифасига қараб лицензия учун тўлов қилиб, уни қўлга киритиб, концерт ва тўй-томошаларда кўрсатган фаолиятидан даромад солиғи тўлашмайди. Бу Солиқ кодексида белгилаб қўйилган.

Бироқ, лицензия олган киши хусусий тадбиркор ҳисобланади ва ойига 1 марта ягона ижтимоий суғурта тўловини ўз вақтида амалга ошириб туриши керак. Бу 1 минимал иш ҳақи — 150 минг сўмга яқин суммани ташкил этади.

Айрим санъаткорларимиз ушбу тўловни ўз вақтида тўлашмаётгани аниқланди. Айримларининг давлат олдидаги қарзи 3 миллион сўмгача етади. Республика бўйича 3 мингдан зиёд санъаткорга лицензия берилгани инобатга олинса, умумий қарз 600 миллион сўмдан ҳам ошгани аниқланди.

«Ўзбекконцерт» давлат муассасаси тўловни ўз вақтида оширмаган хонандаларга 1 июлгача муддат белгилаб берди. Ушбу муддатгача ягона ижтимоий тўловдан қарздорлик тўлиқ ҳажмда тўлаб бермаган санъаткорларнинг лицензияси вақтинча тўхтатилади. “Замин” янгиликларини “Facebook”да кузатиб боринг