2 203
Римнинг “Рома” клуби бу мавсумда футбол мухлислари учун ҳақиқий “қайта туғилиш” эртагига айланди. Таниқли мутахассис Клаудио Раньери жамоани 2024 йил ноябрида қабул қилиб, жадвалнинг пастки қисмидаги жамоани Чемпионлар Лигаси учун курашадиган даражага олиб чиқди. Энди эса у ўзининг кейинги қадами ҳақида расман гапирди.
Раньери – мураббийдан стратегик маслаҳатчига
Маълум қилинишича, мавсум якунлангандан сўнг Клаудио Раньери “Рома”да маъмурий лавозим — бош маслаҳатчи сифатида фаолият юритишни режалаштирган. Унинг сўзларига кўра, у жамоа учун “йўл кўрсатувчи” вазифасини бажаради.
“Мен бош маслаҳатчи бўламан. Клуб учун йўл кўрсатувчи бўлишимни биламан — нима тўғри, нима нотўғри эканлигини маслаҳат бераман. Бироқ, якуний қарорни клуб эгаси қабул қилади. Мухлислар шуни билишлари керакки, агар фикрим инобатга олинмаса, фақат шундагина кетаман. Бугун ўзимни лойиҳанинг марказида ҳис қиляпман”, — деди Раньери журналистларга берган интервьюсида.
“Рома”га янги мураббий келяптими?
Шунингдек, тажрибали мутахассис “Рома”да ўз ўрнини босадиган янги бош мураббий бўйича иш олиб борилаётганини ҳам тасдиқлади. У номзодлар ҳақида аниқ маълумот бермаган бўлса-да, клубда бу борада жиддий ҳаракатлар кетаяпганини қайд этди.
Бу эса шундан далолат берадики, “Рома”нинг раҳбарияти Раньерига наfaqat бугунги муваффақиятлар учун, балки келажакда ҳам муҳим рол бермоқчи. Футбол фалсафаси ва тажрибаси жамоа ривожи учун хизмат қилиши кутилмоқда.
Нима учун Раньери “Рома” учун қимматли шахс?
Клаудио Раньери — футбол тарихида ўз ўрнига эга мутахассис. Унинг 2016 йилда “Лестер” билан Англия премьер-лигасидаги чемпионлиги, мураббийлик тажрибаси ва “Рома”га бўлган садоқати жамоа мухлислари орасида ҳамиша юксак баҳоланган.
Ҳозир эса у “Рома”даги лойиҳа марказида эканлигини таъкидлаб, келажакда ҳам жамоа йўналишини шакллантиришда фаол иштирок этишини маълум қилмоқда. «Замин»ни Telegram’да ўқинг!
23:46, 5-04-2025
