Италиялик тажрибали мутахассис Клаудио Раньери миллий терма жамоа бош мураббийлигига тайёр эканини маълум қилди. Sky Sports нашри хабар беришича, 74 ёшли мураббий агар Италия термасидан таклиф тушса, уни кўриб чиқишга тайёрлигини очиқ айтган.
Раньери аввалроқ ҳам Италия миллий жамоасини бошқариш имконияти бўлганини эслади. Бироқ ўша вақтда у “Рома”да фаолият юритган ва бир вақтнинг ўзида икки муҳим вазифани бажариш имкони йўқлигини таъкидлаган.
“Мен аввал Италия терма жамоасини бошқариш таклифига “йўқ” дегандим, чунки “Рома”да ишлардим ва икки лавозимни бир вақтда эгаллаш имкони йўқ эди. Ҳозир эса эркинман, шунинг учун таклиф бўлса, нега рози бўлмаслигим керак? Мамлакатинг чақирса, “ҳа” дейсан-да”, — деди Раньери.
Маълумот учун, Клаудио Раньери апрель ойи охирида “Рома” раҳбарияти маслаҳатчиси лавозимини тарк этган. Айтилишича, бунга бош мураббий Жан Пьеро Гасперини билан келишмовчилик юзага келгани сабаб бўлган. Шу тариқа, италиялик мутахассис айни пайтда эркин ва янги чақириққа тайёр ҳолатда турибди.
Раньери жаҳон футболида катта тажрибага эга мураббийлардан бири ҳисобланади. У фаолияти давомида “Рома”, “Кальяри”, “Уотфорд”, “Сампдория”, “Челси”, “Атлетико”, “Фиорентина”, “Наполи”, “Фулхэм”, “Нант”, “Лестер”, “Монако”, “Интер”, “Ювентус”, “Парма”, “Валенсия” каби клублар, шунингдек, Греция миллий терма жамоасини бошқарган.
Мутахассиснинг энг катта ютуқларидан бири, албатта, “Лестер” билан Англия Премьер-лигасида чемпионликка эришгани ҳисобланади. Бу воқеа футбол тарихидаги энг катта сенсациялардан бири сифатида ҳалигача эслаб келинади. Раньери ана шундай тажриба, сабр ва жамоани руҳлантира олиш қобилияти билан танилган.
Ўзбекистон мухлислари учун ҳам Раньери номи бегона эмас. Миллий терма жамоамиз сардори ва энг яхши тўпурари Элдор Шомуродов Италиядаги фаолияти давомида айнан Клаудио Раньери қўл остида “Кальяри” ва “Рома” жамоаларида тўп сурган. Эътиборлиси, Раньери билан ишлаган даврларда Элдор жамоада муҳим футболчи мақомига кўтарила олган.
Бу жиҳат мутахассиснинг футболчилар билан ишлаш, уларга ишонч бериш ва керакли пайтда тўғри роль топиб бериш борасидаги тажрибасини кўрсатади. Раньери одатда жамоага тартиб, интизом ва руҳий барқарорлик олиб кирадиган мураббийлардан саналади.
Италия миллий терма жамоаси эса айни пайтда мураккаб даврни бошдан кечирмоқда. Жамоа 2026 йилги Жаҳон чемпионатига чиқа олмади. Плей-оффда Босния ва Герцеговинага қарши мағлубиятдан сўнг бош мураббий Женнаро Гаттузо истеъфога чиқарилди.
Италия жаҳон футболида энг катта тарихга эга терма жамоалардан бири ҳисобланади. Бироқ “скуадра адзурра” қаторасига иккинчи марта мундиалдан четда қолмоқда. Жаҳон чемпиони бўлган кам сонли термалардан бири учун бу жуда оғир зарба ва катта инқироз белгиси.
Шундай вазиятда Раньери каби тажрибали, босимни кўрган ва турли муҳитларда ишлаган мутахассиснинг номзоди Италия учун қизиқ вариант бўлиши мумкин. У терма жамоани қайта қуриш, футболчиларга ишонч бериш ва миллий ғурурни тиклаш вазифасини ўз зиммасига олишга тайёр кўринмоқда.
Энди асосий савол Италия футбол федерацияси қандай қарор қабул қилишида. Раньери эса ўз позициясини аниқ билдирди: агар мамлакат чақирса, у “ҳа” дейишга тайёр. Бу эса тажрибали мураббийнинг футболга ва Италия термасига бўлган муносабатини яна бир бор кўрсатади.
“Zamin”ни Telegram'да ўқинг!
