Жоау Фелиш "Фламенго" сафига қўшиладими? Клубнинг португалиялик юлдузга қизиқиши катта

Португалиялик иқтидорли футболчи Жоау Фелиш бу ёзда ўз карьерасини кутилмаган жойда — Бразилиянинг машҳур "Фламенго" клубида давом эттириши мумкин. Бу ҳақда Британиянинг "Sky Sports" нашри маълум қилмоқда.

Маълумотларга кўра, Бразилия футболи грандларидан бири ҳисобланган "Фламенго" клуби Клублар ўртасидаги жаҳон чемпионатига (КЎЖЧ) жиддий тайёргарлик кўриш ва жамоани кучайтириш мақсадида Фелишни ўз сафида кўришни истамоқда. Эслатиб ўтамиз, мазкур турнир 15 июндан 13 июлгача АҚШда ўтказилади.

"Фламенго" клуби раҳбарияти мусобақада юқори натижага эришишни асосий мақсад қилиб белгилаган ва шу сабабли трансфер бозорида фаол иш олиб бормоқда. Жамоанинг энг муҳим трансфер мақсадларидан бири айнан Жоау Фелиш ҳисобланади. Маълумки, португалиялик футболчи жорий мавсумни "Милан" клуби сафида ижара асосида ўтказди. У февраль ойидан буён Милан клубида 16 та ўйинда майдонга тушган бўлса-да, италияликлар унинг ижарасини узайтиришга қизиқиш билдирмаяпти.

Ҳозирда Фелишнинг шартномаси "Челси" клубига тегишли бўлиб, у лондонликлар билан яна олти йиллик келишувга эга. Аммо футболчининг келажаги катта эҳтимол билан яна бир марта ижара орқали ҳал қилинадиган кўринади. Бундай ҳолатда "Фламенго" клуби уни ёз ойларидаги жаҳон чемпионати учун таркибга қўшиб олиш имкониятига эга бўлади.

Эътиборлиси, агар ушбу трансфер амалга ошса, Фелиш 20 июнь куни Клублар ўртасидаги жаҳон чемпионати доирасидаги ўйинда айнан ўзининг асосий клуби – "Челси"га қарши майдонга тушиши мумкин. Бу ҳолат, шубҳасиз, футбол мухлисларининг қизиқишини янада оширади.

Жоау Фелишнинг "Фламенго"га ўтиши нафақат Бразилия клуби, балки футболчи учун ҳам муҳим қадам бўлиши мумкин. Сабаби, ушбу турнирдаги яхши натижа футболчининг келажакдаги клуб танлови ва карьераси учун муҳим рол ўйнаши мумкинлиги таъкидланмоқда.

Қисқа вақт ичида ушбу трансфер бўйича аниқлик киритилиши кутилмоқда. «Замин»ни Telegram’да ўқинг!