Ўзбекистон Кубоги 1/4 финалида “Динамо” ва “Шўртан” жамоалари ўртасидаги баҳс 3:0 ҳисобида самарқандликлар фойдасига ҳал бўлди. Учрашувдан сўнг "Шўртан" бош мураббийи Элдор Мойлиев матбуот анжуманида жамоаси ўйини ҳақида тўхталиб ўтди.
Ўйин таҳлили
— Беллашувни яхши бошладик, дастлаб иккита қулай имконият яратдик. Бироқ улардан унумли фойдалана олмадик. “Динамо” эса стандарт ҳолатлардан икки бор гол уриб, устунликни қўлга киритди. Шу заҳоти ўйин биз учун қийинлашиб, орқага кетди. Иккинчи бўлим бутунлай рақиб томонидан назорат қилинди. Ростини айтсам, бугунги баҳс ўйинларимиздан энг заифларидан бири бўлди, — деди Мойлиев.
Кубок ва Суперлига фарқи
— Жамоамиз Суперлигада доим рақобатбардош ўйин кўрсатиб келган. Аммо бугунги беллашувда умуман ўзимизни кўрсата олмадик. Албатта, Кубок билан Суперлига икки хил мусобақа. Биз Кубок баҳсига жиддий тайёргарлик кўргандик, аммо икки гол руҳан синдириб қўйди. Бирга-бир вазиятларда ҳам барчасида енгилдик. Шу жиҳатдан “Динамо” яхши тайёргарлик кўргани кўзга ташланди, — деб таъкидлади мураббий.
Ғалаба учун иштиёқ ҳақида
— Биз майдонга ғалаба учун тушдик. Агар ютганимизда, ярим финалда энг кучли тўрт жамоадан бири бўлардик. Буни барча яхши тушуниб турганди. Аммо афсуски, натижа кутилганидек бўлмади. “Динамо” ҳар бир жиҳатда устун келди, — дея хулоса қилди Мойлиев.
Мутахассис сўзларига кўра, “Шўртан” учун бу мағлубият катта дарс бўлиб хизмат қилади. Мухлислар эса жамоанинг келгуси Суперлига баҳсларида ўзини қай даражада тиклаб олишини қизиқиш билан кутмоқда.
Манба: Championat.asia
«Замин»ни Telegram’да ўқинг!
