Тошкент ва Душанбе шаҳарларида катта қизиқиш билан ўтган «CAFA Nations Cup-2025» турнири ўз якунига етди ва индивидуал соврин эгалари аниқланди.
Турнир давомида ўзининг самарали ўйини билан ажралиб турган Ўзбекистон миллий жамоаси ҳужумчиси Игор Сергеев мусобақанинг энг яхши тўпурари сифатида эътироф этилди. Унинг аниқ зарбалари ва ҳал қилувчи голлари жамоанинг муваффақиятли чиқишига катта ҳисса қўшди.
Шунингдек, ҳал қилувчи финалда ғалаба голига муаллифлик қилган Ҳожиакбар Алижонов энг яхши футболчи совринига сазовор бўлди. Унинг майдондаги иродаси, тезкорлиги ва кучли ўйини кўпчиликнинг юрагида ёрқин таассурот қолдирди.
Дарвозабонлар орасида эса энг ишончли посбон деб Эрон термаси аъзоси Саидпайям Ниёзманд топилди. У турнир давомида кўплаб хавфли зарбаларни қайтаришга муваффақ бўлиб, жамоаси учун муҳим ўйинларни олиб борди.
Эслатиб ўтамиз, мусобақанинг финалида Ўзбекистон миллий жамоаси Эрон билан тиш-тирноқли беллашув ўтказди. Асосий вақт дуранг билан якунланган бўлса-да, қўшимча дақиқаларда Алижоновнинг голи ҳисобни очди ва миллий жамоамизга тарихий ғалаба олиб келди.
Шу тариқа, Ўзбекистон мусобақа ғолиби сифатида мамлакатимиз футбол тарихи саҳифасига яна бир ёрқин саҳифа қўшди, совриндор футболчилар эса ўз меҳнатлари билан миллионлаб мухлисларнинг олқишига сазовор бўлди.
«Замин»ни Telegram’да ўқинг!
