“Ливерпул” сафида ҳимоя чизиғида асосий ўрин эгаллаб келаётган Франция терма жамоаси аъзоси Ибраима Конате клуб билан шартномасини узайтиришдан уч марта бош тортди.
Маълумотларга кўра, 26 ёшли марказий ҳимоячи амалдаги шартномаси тугаши билан эркин агент мақомига эга бўлади. Унинг амалдаги келишуви 2026 йил 30 июнда якунланади. Демак, агар янги шартнома тузилмаса, Конате “Ливерпул”ни бепул тарк этиб, Мадриднинг “Реал” клубига ўтиши мумкин.
Футболчининг ўзи “Қироллик клуби”дан мавсум сўнгида шартнома таклиф қилинади деган кафолат олгани айтилмоқда. Шу сабабли, у мерсисайд клубининг янги таклифларига розилик билдирмаяпти. “Ливерпул” раҳбарияти эса Конатенинг кетишини деярли аниқ деб ҳисобламоқда.
Шу билан бирга, мадридликлар ҳимоя чизиғини мустаҳкамлаш учун яна бир вариантни кўриб чиқмоқда. Хусусан, “Арсенал” билан 2027 йил июнига қадар шартномага эга бўлган Вильям Салиба номзоди ҳам кўриб чиқилаётир. Агар у ўшанда эркин агентга айланса, “Ливерпул”нинг собиқ юлдузи Трент Александер-Арнолд каби “Реал” сафига бепул тарзда қўшилиши мумкин.
Шу тариқа, Конатенинг тақдири жамоа вакиллари учун деярли аниқ кўрина бошлади. Энди эътибор мадридликлар қачон ва қандай йўл билан уни ўз сафларига қўшиб олишида қолди.
«Замин»ни Telegram’да ўқинг!
