Ўзбекистон Кубоги ярим финалида «Пахтакор» ва «Динамо» ўртасидаги драматик тўқнашув 0:0 ҳисобида якунланиб, ғолиб пенальтилар серияси орқали аниқланди. Охир-оқибат «шерлар» ҳал қилувчи зарбаларда устун келиб, финалга йўл олди. Самарқандликлар бош мураббийи Вадим Абрамов баҳсдан кейин матбуот анжуманида қатнашиб, учрашув ва жамоа ҳолати ҳақида батафсил фикр билдирди.
«Ҳисоб очилмаган бўлса ҳам, ўйин мухлислар учун жуда қизиқарли бўлди деб ўйлайман. Биринчи бўлимда ёмон ҳаракат қилмадик, аммо иккинчи бўлимда ўйинимиз пасайди. Кейин эса «Пахтакор»нинг "класс"и ва тажрибаси ўз сўзини айтди. Пенальтилар сериясида рақиб яхшироқ ҳаракат қилди, биз эса «лотерея»да хато қилдик. Шунга қарамай, йигитларимдан миннатдорман – улар кучли рақибга қарши охиригача курашди», – деди Абрамов.
Унинг сўзларига кўра, мағлубиятни қандай йўл билан қабул қилишнинг фарқи йўқ: «Асосий вақтда ёки қўшимча бўлимларда ютқазиб қўйганимизда ҳам натижа ўзгармас эди. Тарихда «Пахтакор» ярим финалда «Динамо»ни енггани қолади, холос. Биз учун эса бу – ўтмиш. Энди Суперлига баҳсларига тайёргарлик кўрамиз. Ҳали мавсум якунига қадар 9та ўйинимиз бор ва барчаси ўз қўлимизда».
Абрамов жамоанинг кетма-кет мағлубиятларидан кейинги руҳий аҳволига ҳам тўхталиб ўтди: «Ҳар бир рақибни жиддий қабул қилишимиз керак. Акс ҳолда мавсум биз учун омадсиз кечади. Профессионаллик шундай вазиятларда синовдан ўтади. Биз ҳали ҳам курашдамиз ва йўлдан қайтмаймиз».
Пенальтилар масаласига алоҳида эътибор қаратган мураббий: «Бу фақат ўзбек футболчиларига тегишли муаммо эмас. Марко ҳам бугун гол ура олмади. Пенальти – катта босим остидаги жараён. Дунё юлдузлари ҳам – Баджо, Месси – шундай ҳолатларни бошдан кечирган. Машғулотлардаги муваффақият майдонда ҳам такрорланади деган қоида йўқ. Шу сабабли бундай вазиятларда хато қилиш табиий», – дея таъкидлади у.
Мураббийнинг фикрича, «Динамо» Суперлигада ҳали имкониятлардан маҳрум эмас. У жамоа олдидаги ўйинларда кучли рақобат кўрсата олишига ишонч билдирди.
«Замин»ни Telegram’да ўқинг!
