Европа Чемпионлар Лигаси 2-туридан ўрин олган баҳсда «Ливерпуль» турк гранди «Галатасарай»га қарши сафарда майдонга тушди ва 0:1 ҳисобида мағлубиятга учради. Учрашувдан сўнг англияликлар бош мураббийи Арне Слот «Amazon Prime» эфири орқали ўз фикрларини билдирди.
«Ҳафсаламиз пир бўлди»
Мураббий жамоаси ўйинда кўрсатган ҳаракатдан қониқмаганини яширмади:
«Яна ҳафсалам пир бўлди. Тўп билан ҳам, тўпсиз ҳам биз «Кристал Пэлас»га қарши баҳсдан бутунлай бошқача тарзда ўйнадик. Биринчи бўлимда анча яхши ҳаракат қилдик, ҳатто ҳисобни очиш учун қулай имкониятга эга бўлдик. Аммо баъзи вазиятларда, айниқса пенальтида, рақиблар бизни чалғитишга эришишди. Бу учун Доминик Собослаини айблай олмайман. Улар 20 фоизлик пенальтини 100 фоизлик имкониятга айлантиришди, жуда айёрона иш бўлди».
«Натижа майда-чуйда деталларга боғлиқ»
Слот сўзини давом этаркан, ўтган мавсумдан жуда ҳам узоқлашмаганини таъкидлади:
«Биз ўтган мавсумда кўрсатган даражамиздан унчалик узоқ эмасмиз. Аммо баъзан натижалар майда-чуйда деталларга боғлиқ бўлади. «Галатасарай»га қарши ўйин осон эмас, улар жуда қаттиқ ҳаракат қилишди. Энди биз учун «Челси» билан оғир баҳс кутмоқда. Ҳар нарса майда деталларда ҳал бўлади, лекин иккинчи марта ҳам бу омиллар бизнинг фойдамизга ишламаяпти».
«Иккинчи бўлимда суръатни йўқотдик»
Мураббийнинг фикрича, танаффусдан кейин «Ливерпуль» кутилган даражада ўйнай олмади:
«Биринчи ярмида жуда кўп ижобий жиҳатларни кузатдим, иккинчи ярмида эса анча камроқ. Танаффусдан кейин тўп ўйинда кам бўлди. Рақиб ҳужумчиси бир неча бор майдонга йиқилди, шу сабабли ўйин суръатини сақлаб қолиш қийин бўлди».
Алиссоннинг жароҳати
Шунингдек, Арне Слот мухлислар учун яна бир қайғули янгиликни ҳам маълум қилди:
«Дарвозабон Алиссон жароҳат олгани сабабли «Челси»га қарши ўйинда майдонга туша олмайди».
“Zamin”ни Telegram'да ўқинг!
