Эрон терма жамоаси бош мураббийи Амир Галенои Россия билан бўлиб ўтган ўртоқлик учрашувидан (2:1) сўнг ўйин ҳақидаги фикрлари билан ўртоқлашди.
Мураббийнинг таъкидлашича, беллашув тактик жиҳатдан қизиқарли бўлган ва жамоаси Россиянинг кучли рақобатига қарамай, ўйин давомида яхши имкониятлар яратган.
“Тактика нуқтаи назаридан жуда қизиқ ўйин бўлди. Россия термасини ғалаба билан табриклайман. Албатта, бундай катта стадионда, ўз мухлислари ёрдамида ҳаракат қилаётган рақибга қарши ўйнаш осон эмас. Бироқ биз ҳам ўз салоҳиятимизни кўрсатдик,” — деди Галенои.
Эрон устозига кўра, иккинчи бўлимда жамоа фаолроқ ҳаракат қилган ва бир неча бор ҳисобни тенглаштириш имкониятига эга бўлган.
“Танаффусдан кейин жамоамизнинг ўйини анча фаоллашди. Бир нечта гол уриш имкониятлари бўлди, аммо улардан фойдалана олмадик. Афсуски, ўйин охирида иккинчи голни ҳам ўтказиб юбордик,” — дея қўшимча қилди мутахассис.
Амир Галенои шу билан бирга ушбу беллашувни жаҳон чемпионати олдидан катта тажриба сифатида баҳолади.
“Натижа биз кутгандек бўлмади, аммо бу ўйин бизга катта сабоқ бўлди. Жаҳон чемпионати олдидан кучли рақибга қарши ўйнаш орқали кўп нарса ўргандик. Бу тажриба биз учун жуда қимматли,” — деди у сўзини якунлаб.
Эслатиб ўтамиз, Россия ва Эрон ўртасидаги ўртоқлик баҳсида мезбонлар 2:1 ҳисобида ғалаба қозонди.
“Zamin”ни Telegram'да ўқинг!
