Англия Премьер-лигасининг саккизинчи турида “Манчестер Сити” ўз майдонида ҳар қандай рақибни синовдан ўтказа оладиган “Эвертон”га қарши муҳим баҳс олиб боради. “Шаҳарликлар” бу ўйин орқали Европа Чемпионлар лигаси йўлланмаси учун курашда кучли тўртликка яқинлашишни мақсад қилган.
Бироқ учрашув олдидан Хосеп Гвардиола жамоасида кадрлар бўйича муаммолар юзага келган эди. Асосий таркибнинг бир неча етакчи ўйинчилари жароҳат сабаб охирги турларда жамоага ёрдам бера олмаган.
Standard.co.uk нашрининг хабар беришича, “Манчестер Сити”да жароҳатлар билан боғлиқ вазият барқарорлаша бошлаган. Испаниялик мутахассис кутган айрим футболчилар энди майдонга қайтишга яқин.
Жамоа етакчиларидан Родри Испания терма жамоаси сафида қисқа вақт ҳаракат қилди ва у тез орада асосий таркибга қайтади. Шунингдек, Гвардиола учун муҳим ҳисобланган Райан Шерки, Умар Мармуш, Райан Айт-Нури ва Абдуқодир Ҳусанов ҳақида ҳам ижобий янгиликлар келиб тушган.
Райан Айт-Нури
Ёзда “Вулверхэмптон”дан трансфер қилинган жазоирлик ҳимоячи августда “Тоттенхэм”га қарши баҳсда шикаст олиб, саккизта ўйинни ўтказиб юборганди. Энди у халқаро танаффусдан кейин жамоа билан машғулотларга қўшилиши кутилмоқда.
Умар Мармуш
Миср терма жамоаси сафидаги баҳсда тиззасидан жароҳат олган ҳужумчи бир ой давомида сафдан ташқари бўлганди. Энди у тўлиқ тикланиб, машғулотларни бошламоқда ва “Эвертон”га қарши ўйинда майдонга тушишни режалаштирмоқда.
Абдуқодир Ҳусанов
Ўзбекистонлик ҳимоячи Абдуқодир Ҳусанов ҳам тикланиш жараёнини якунлаб, жамоага қўшилиш арафасида. У охирги ўйинларни ўтказиб юборган бўлса-да, халқаро танаффусдан кейин “Сити” сафида қайта ҳаракат қилиши кутилмоқда.
Гвардиоланинг ўз сўзларига кўра, Ҳусанов 18 октябрь куни “Эвертон”га қарши бўладиган баҳсда жамоага ёрдам бериши мумкин.
Шундай қилиб, “Манчестер Сити” мухлислари учун яхши хабар — жароҳат олган етакчилар бирин-кетин сафга қайтмоқда. Бу эса жамоанинг чемпионатдаги кейинги синовларга янада кучли таркиб билан чиқишига имкон беради.
“Манчестер Сити” – “Эвертон” учрашуви 18 октябрь куни Тошкент вақти билан соат 19:00 да старт олади.
“Zamin”ни Telegram'да ўқинг!
