Ўзбекистон миллий жамоаси собиқ бош мураббийи Сречко Катанецнинг уч нафар ёрдамчиси Ўзбекистон футбол ассоциацияси (ЎФА)га қарши судга мурожаат қилишга тайёрланмоқда. Бу ҳақда Asia Sport нашри хабар тарқатди.
Манба маълумотига кўра, словениялик мутахассислар ФИФАнинг низоларни ҳал этиш палатасига даъво аризаси билан чиқишни режалаштирган. Улар ЎФАдан тахминан 350 минг еврога яқин қарз ундириб олиш ниятида.
Маълум қилинишича, мазкур мураббийлар билан 2026 йил ёзигача амал қилиш мўлжалланган шартнома тузилган бўлган. Бироқ Фабио Каннаваро ва унинг мураббийлар штаби тайинланганидан кейин, уларнинг фаолияти тўхтатилган.
Ҳолатга яқин манбаларнинг таъкидлашича, ЎФА уларга ёшлар жамоалари тизимида иш давом эттириш имкониятини таклиф этган, аммо мутахассислар бу таклифни қабул қилмаган.
«Бу мутахассислар бир неча йил давомида миллий жамоани жаҳон чемпионатига тайёргарлик жараёнида бошқарган ва айнан шу лойиҳа учун шартнома имзолаган эдилар. Шу сабабли, улар ёшлар жамоасига ўтишни тўғри деб ҳисобламадилар», — деб ёзади Asia Sport.
Ҳозирда ФИФАга расмий даъво аризаси тайёрланмоқда. Агар мурожаат қаноатлантирилса, ЎФА мутахассисларга шартномада кўрсатилган компенсация миқдорини тўлаб беришга мажбур бўлади.
Мутахассислар ушбу масалада Ўзбекистон томони билан бир неча марта музокара олиб боришгани, аммо кутилган натижа бўлмагани айтилади. Шу сабаб, улар ишни халқаро футбол органига олиб чиқишга қарор қилган.
Футбол жамоатчилиги мазкур воқеани турлича баҳоламоқда — айримлар бу ҳолатни мутахассислар ҳуқуқий ҳақини ҳимоя қилиш деб ҳисобламоқда, бошқалар эса ЎФАнинг янги бошқарув тизимидаги ислоҳотлар натижаси деб кўрмоқда.
Ҳар ҳолда, ФИФА қарорини кутиш орқали вазиятнинг кейинги йўналиши аниқ бўлади — у ёки пулли келишув билан якунланади, ёки суд орқали ҳал этилади.
“Zamin”ни Telegram'да ўқинг!
