Ўзбекистон миллий терма жамоаси яқин кунларда Бирлашган Араб Амирликларида ташкил этиладиган нуфузли “Ал Айн халқаро кубоги” мусобақасида иштирок этади. Бу ҳақда Ўзбекистон футбол ассоциацияси матбуот хизмати хабар тарқатди.
Турнирда жаҳон чемпионатида иштирок этадиган тўрт миллий жамоа — Ўзбекистон, Эрон, Миср ва Кабо-Верде терма жамоалари майдонга тушади. Бу мусобақа жаҳон даражасидаги жамоалар фонида куч синовидан ўтиш, янги тактик ечимларни синаб кўриш ва жаҳон чемпионати олдидаги тайёргарликни мустаҳкамлаш учун муҳим синов сифатида қаралмоқда.
Ўзбекистон терма жамоаси мусобақадаги илк баҳсини 14 ноябрь куни Мисрга қарши ўтказади. Бу ўйин катта қизиқиш билан кутиляпти, чунки африкалик рақиб ўзининг жисмоний куч ва тезкор ҳаракатлари билан машҳур. Бир кун олдин, 13 ноябрда, иккинчи ярим финалда Эрон Кабо-Верде билан куч синашади.
Турнир форматига кўра, ғолиб жамоалар 18 ноябрь куни бўлиб ўтадиган финалда ўзаро баҳс олиб боришади. Мағлуб бўлган жамоалар эса 17 ноябрь куни 3-ўрин учун беллашади. Барча учрашувлар БААнинг “Ҳазза бин Зайед” стадионида ўтказилади.
Ўзбекистон миллий жамоаси бош мураббийи Фабио Каннаваро мусобақа олдидан жамоага руҳий тайёргарлик муҳимлигини таъкидлади. Унинг фикрича, жаҳон чемпионатига йўлланма қўлга киритилгани билан бефарқликка йўл қўйиш мумкин эмас. “Биз ҳар бир баҳсда ўз сўзимизни айтишимиз керак, рақиб ким бўлишидан қатъи назар, фақат ғалаба учун майдонга чиқамиз”, — деган Каннаваро.
Бу турнир Ўзбекистон учун нафақат халқаро нуфузни ошириш, балки ёш футболчиларга тажриба тўплаш имконини берувчи муҳим майдон бўлиши кутилмоқда. Мухлислар эса жамоадан фидойилик, янги ғалабалар ва кучли рақибларга қарши муносиб ўйин кутишмоқда.
“Zamin”ни Telegram'да ўқинг!
