БААда ўтаётган халқаро ўртоқлик мусобақаси қизғин паллага кирди ва энди энг кутилган яримфинал баҳсларидан бири — Ўзбекистон ҳамда Миср миллий жамоалари ўртасидаги тўқнашув навбатга келди. Мухлислар учун эса, аввало, ҳар икки жамоа ҳақидаги асосий маълумотлар ҳамда учрашув олдидан қайси жиҳатларга эътибор қаратиш кераклиги қизиқ.
Ўзбекистон миллий жамоаси — янги тарих остонасида
Фабио Каннаваро бошчилигидаги Ўзбекистон миллий жамоаси йиллар давомида орзу қилинган мақсад — илк бор жаҳон чемпионати финал босқичига йўл олишни уддалади. АҚШ, Мексика ва Канада ҳамкорликда ўтказадиган мундиалда иштирок этиш учун терма жамоа ҳозирда жиддий тайёргарлик жараёнида.
Ўтган ойдаги ўртоқлик учрашувлари ҳам бунинг бир қисми бўлди: Кувайт устидан ишончли 2:0 ҳисобидаги ғалаба ва Уругвайга қарши маъқул ўйинга қарамай 1:2 ҳисобидаги минимал мағлубият. Энди эса БААдаги мусобақа давомида Миср каби тажрибали рақибга қарши синов турибди.
Каннаваро ноябр ойи йиғинига 26 нафар футболчини жалб этди. Рўйхатдан янги исмлар — Достонбек Ҳамдамов ва Сардор Баҳромовнинг пайдо бўлиши жамоада рақобат янада кучайганини кўрсатади.
Жамоа таркибида тажрибали Элдор Шомуродов, Игор Сергеев, Одилжон Ҳамробеков, Абдуқодир Ҳусанов каби асосий ўйинчилар бор. Дарвозада эса Абдувоҳид Неъматовнинг асосий номзод бўлиши кутилмоқда.
Миср терма жамоаси — Африка грандининг янги мақсадлари
Африка қитъасининг энг кучли ва тажрибали жамоаларидан бири саналган Миср терма жамоаси мундиал йўлланмасини осонлик билан қўлга киритди. Саралаш босқичидаги натижалар бунга яққол мисол — 8 ғалаба, 2 дуранг ва жуда ишончли ўйин.
Муҳаммад Салоҳ ва Умар Мармуш каби етакчи футболчилар борлиги жамоанинг салоҳиятини янада оширади. Жамоа куни кеча эълон қилинган рўйхатда Маҳмуд Трезеге, Аҳмед Саид Зизо, Мустафа Муҳаммад каби топ-ўйинчилар ҳам бор.
Бироқ Ўзбекистон билан баҳсда рақибнинг муҳим ўйинчиларидан бири — Умар Мармуш қатнашмайди. У оилавий сабабларга кўра йиғинни тарк этган. Шу билан бирга, мухлислар асосий юлдуз Муҳаммад Салоҳнинг майдонга тушишини кутмоқда.
Ўйин олдидаги йўқотишлар
Ўзбекистон жамоасида икки муҳим ном — Аббосбек Файзуллаев ва Жалолиддин Машарипов жароҳати боис БААдаги ўйинларни ўтказиб юборади. Иккаласи ҳам тикланиш жараёнига қайтган бўлса-да, жамоага ёрдам бера олмайди.
Мисрда эса юқорида айтилган Мармушнинг йўқлиги асосий йўқотиш бўлди.
Баҳс қаерда ва қачон?
Катта қизиқиш уйғотаётган Ўзбекистон – Миср учрашуви 14 ноябрь, жума куни Абу-Дабидаги “Ҳазза Бин Заид” стадионида ўтказилади. Беллашув Тошкент вақти билан соат 21:00 да старт олади.
Қисқа қилиб айтганда — икки жамоа ҳам мундиал олдидан жиддий синовни ўтказиши кутилмоқда. Таҳлилчилар бу баҳсни ўртоқлик ўйини деб эмас, балки рақибнинг ҳақиқий салоҳиятини баҳолаш учун муҳим учрашув сифатида қабул қилишмоқда.
Мухлислар учун эса бир нарса аниқ: жума куни кечқурун БАА осмони остида жуда қизиқ баҳс кутилаяпти.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
