Эрон миллий терма жамоасининг тезкор ва ҳаракатчан ҳужумчиси Меҳди Ҳашемнежад «Ал Айн» финалидан олдин бўлажак учрашув ҳақида ўйинчига хос сокинлик ва ишонч билан фикр билдирди. Унинг айтганларига қараганда, Эрон жамоаси тўлиқ отланиб, финалда кучини аямасдан майдонга тушишга тайёр. Йигитлардаги кайфият ҳам, иштиёқ ҳам юқори.
Унинг сўзларига кўра, жамоа ўтган кунларда финалга махсус тайёргарлик кўрган ва бу саъй-ҳаракатлар ўйинда акс этишига ишонишади. Ҳашемнежад айни пайтдаги суҳбатида ҳамон ўша Ўзбекистонга қарши ўйинни эслаб ўтди. Чунки ўша учрашувнинг 10-дақиқасидаоқ Эрон таркиби ўн киши бўлиб қолган, шунинг учун ўйин реал салоҳиятни кўрсатмаган.
Шу билан бирга у Ўзбекистоннинг сўнгги ўйинлардаги ўсишини эътироф этди: улар Мисрга қарши баҳсда яхши ўйин кўрсатиб, жиддий рақиб эканини исботлади. Шу сабабли бугунги финал ҳам осон кечмаслиги, ҳар бир вазият учун қаттиқ кураш бўлишини таъкидлади. «Ўзбекистон Жаҳон чемпионатига йўл олган жамоа. Бунинг ўзиёқ ўйин қандай шиддатда ўтиши мумкинлигини кўрсатади», — деди у.
Ҳашемнежаднинг фикрича, Эрон жамоасининг асосий вазифаси — бу мураббий топшириқларини аниқ бажариш, ўтган ўйинлардаги камчиликларни тузатиш ва ҳар бир имкониятдан унумли фойдаланиш. Шу йўл билангина улар ўз олдига қўйган мақсад — чемпионликни қўлга киритишга эришиши мумкин.
Трактор клуби футболчиси суҳбат охирида:
«Биз кучли жамоамиз, катта номларимиз бор. Финалда ўз ўйинимизни татбиқ қила олсак, натижа ҳам биз томонга оғади. Асосийси — ишонч ва жамоавий бирлик», — дея таъкидлаб ўтди.
Финал ушбу мини-турнирдаги энг қизғин ва интизорлик билан кутилаётган баҳслардан бири бўлиши шубҳасиз. Эрон чемпионликка интиляпти, Ўзбекистон эса ўз кучини яна бир бор дунёга намойиш этишга мойил.
Меҳмон гуруҳидаги фойдаланувчилар ушбу мақолага изоҳ қолдира олмайди.
