Ўзбекистонда шахмат спортини янги босқичга олиб чиққан ёш истеъдод — Жавоҳир Санжарбекович Синдаров яна бир улкан эътирофга сазовор бўлди. Президент фармонига асосан, халқаро мусобақаларда кўрсатган юксак маҳорат ва аҳамиятли ютуқлари учун унга «Ўзбекистон Республикасида хизмат кўрсатган спортчи» фахрий унвони тақдим этилди.
Бу юксак эътирофнинг давоми сифатида яна бир муҳим янгилик – жаҳон миқёсида муносиб ғалаба қозонган Синдаровга Президент томонидан замонавий, шарт-шароитлари кенг уч хонали хонадон ҳам совға қилинади. Унинг меҳнатидан хабардор ва муваффақиятида улкан ҳиссага эга бўлган мураббийлари эса пул мукофотлари билан рағбатлантирилиши белгиланди.
Маълумки, Жавоҳир Синдаров яқинда Ҳиндистоннинг Гоа шаҳрида ўтган Жаҳон кубоги финалида хитойлик Вей Йига қарши юқори даражада ўйин намойиш қилиб, тай-брейкда 1,5 : 0,5 ҳисобида зафар қучди ва ёш бўлишига қарамай, жаҳон кубоги ғолибига айланди. Бу ютуқ нафақат Ўзбекистон шахмат мактабининг куч-қудратини, балки ёшларимизнинг иродаси, техникаси ва тафаккури қай даражада ривожланганини яна бир бор исботлади.
Синдаровнинг бу муваффақияти мамлакат ёшлари учун катта руҳий куч, янги мақсадлар сари илҳом ва миллий спортнинг халқаро майдондаги нуфузини янада оширишга хизмат қилади.
Шубҳасиз, шахмат оламидаги бу тарихий ғалаба яна кўп йиллар давомида ёдда қолади.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
