Туркия Суперлигасининг 14-турида «Истанбул Башакшеҳир» сафарда «Касимпаша»ни 3:1 ҳисобида мағлуб этди. Беллашувда икки ўзбекистонлик легионер — Элдор Шомуродов ва Аббосбек Файзуллаевнинг гол уришдаги фаол иштироки клуб ғалабасига янада чирой бағишлади. Учрашувдан кейин жамоа бош мураббийи Нури Шаҳин икки футболчи ҳақида илиқ фикрлар билдирди.
Шомуродов — юқори маҳорат, камтар хулқ
Мураббий Элдор ҳақида алоҳида тўхталиб, унинг ҳам инсон сифатида, ҳам футболчи сифатида юқори даражада эканини айтди.
«Элдор нафақат кучли ҳужумчи, балки жуда самимий ва камтарин инсон. Унда ҳеч қандай юлдузликка хос қўпол хулқ йўқ. Нима десак, очиқ юрак билан амалга оширади — асл профессионал», — деди Шаҳин.
Шомуродов беллашувнинг энг сўнгги дақиқаларида жамоанинг учинчи голини киритиб, ғалабани мустаҳкамлаб берди.
Файзуллаев — ўйин тақдирини ўзгартирувчи футболчи
Аббосбек Файзуллаев мусобақанинг 26-дақиқасида жарима зарбасидан юракдан тепилган гўзал голи билан ҳисобни очган эди. Нури Шаҳин унинг ўйинини қуйидагича баҳолади:
«Аббосбек ва Амине Ҳарит ёзда янги мамлакатга мослашишда қийналишди. Лекин биз уларнинг салоҳиятини яхши билганимиз учун ишондик. Иккаласи ҳам ўйин тақдирини бир лаҳзада ўзгартириши мумкин бўлган футболчилар. Бугун ҳам ғалабамизда муҳим рол ўйнашди».
Шаҳин шунингдек, Файзуллаевнинг яқинда жароҳатдан қайтганини таъкидлаб, қишки танаффусга келиб у яна ҳақиқий формасига киришини ишонч билан айтиб ўтди.
Ўзбек легионерлари Туркия чемпионатида ўз номини яна бир бор баланд овозда янгратди. «Башакшеҳир»нинг бу ғалабаси жамоанинг жадвалда юқорига кўтарилишига хизмат қилган бўлса, Шомуродов ва Файзуллаевнинг ўйини мухлисларда янада катта умид уйғотди.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
