Туркия Суперлигасининг 14-туридан ўрин олган муҳим тўқнашувда “Истанбул Башакшеҳир” сафарда “Касимпаша”ни 3:1 ҳисобида мағлуб этди. Бу ўйин нафақат жамоа учун, балки икки ҳамюртимиз — Элдор Шомуродов ва Аббосбек Файзуллаев учун ҳам қувончли воқеага айланди. Чунки уларнинг ҳар бири бир голдан урди ва жамоанинг муҳим ғалабасида асосий ролни ўйнади.
Беллашувдан кейин бош мураббий Нури Шаҳин матбуотга ўз фикрлари билан бўлишиб, ўйиндаги муҳим жиҳатларга тўхталиб ўтди.
"Биринчи бўлимда режамиз ўтди, иккинчисида етишмаётган жиҳатлар кўринди"
Шаҳиннинг таъкидлашича, учрашувнинг дастлабки қисми жамоа режалаштирган сценарий асосида кечди. Мураббий рақибнинг икки хил тактикадан фойдаланиши мумкинлигини олдиндан ҳисобга олган ва футболчилар бунга яхши тайёргарлик кўрган.
— Биринчи бўлимда шогирдларим барча кўрсатмаларни бажаришди, ўйинни назорат қилдик ва бизни қониқтирадиган ҳисобни қўлга киритдик, — деди мураббий.
Бироқ иккинчи таймда вазият ўзгарганини ҳам яширмади:
— Иккинчи бўлимни идеал деб айта олмайман. Бу ҳолат бир неча бор такрорланмоқда. Куч тақсимоти, ўйин интизоми ва 90 дақиқа давомида барқарорликда ўсишимиз зарур. Агар бу жиҳатларни йўлга қўйсак, биздан жуда кучли жамоа чиқади.
"Бир киши кам бўлиб қолиш ўйинни қийинлаштирди"
Шаҳиннинг айтишича, учрашувда “Башакшеҳир” ноўрин вазият туфайли бир футболчисиз қолган ва бу эса жамоадан қўшимча меҳнат талаб қилган.
— Бир киши кам бўлиб қолганимиз вазиятни оғирлаштирди. Шундан кейин қўшимча энергия сарфлашга тўғри келди, — деди у.
"Трабзонспор"га қарши мағлубиятдан кейин бу ғалаба — даво"
Мураббий ўтган турдаги мағлубиятдан кейин бу ғалаба жамоа учун катта руҳий қувват берганини таъкидлади:
— Уч очко олганимиздан жуда хурсандман. Айниқса, “Трабзонспор”га қарши аламли мағлубиятдан кейин бу ғалаба биз учун ҳақиқий даво бўлди. Олдинда узоқ йўл бор, аммо биз тўғри йўлдамиз. Ишонаманки, охир-оқибат муносиб муваффақиятга эришамиз.
Шу билан бирга, Элдор Шомуродов ва Аббосбек Файзуллаевнинг голлари жамоага муҳим бурилиш олиб келди ва бу икки футболчининг формада эканини яна бир бор кўрсатди. Мухлислар учун бу ғалаба — икки карра қувонч: жамоа ютди, ўзбекистонликларнинг ўйини ёрқин чиқди.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
