Эрон Про-лигасининг навбатдаги турида «Персеполис» мухлисларини қувонтирган муҳим ғалабага эришди. Теҳрон клуби «Пайкан»га қарши ўйинда минимал — 1:0 ҳисобида устун келди. Учрашув тақдирини эса Ўзбекистон миллий терма жамоаси аъзоси Остон Ўрунов томонидан киритилган ягона гол ҳал қилди.
Бу ғалаба «Персеполис» учун нафақат турнир жадвалида қимматли очколарни тақдим этди, балки Эрон чемпионати тарихида ўзига хос рекорд сифатида ҳам қайд этилди. Маълум бўлишича, Про лига тарихида ҳеч бир жамоа «Пайкан»ни «Персеполис» каби кўп марта мағлуб этмаган.
Айни пайтга қадар Теҳрон клуби ушбу рақибга қарши ўтказган ўйинларда жами 92 очко жамғарган. Бу кўрсаткич «Персеполис»ни мазкур рақобатда мутлақ пешқадамга айлантириб қўйди. Мутахассислар таъкидлашича, бу натижа клубнинг йиллар давомидаги барқарор ўйини ва тажрибасини яққол акс эттиради.
Қизиқ жиҳати шундаки, «Пайкан» Эрон чемпионатининг 25 мавсумининг 5 тасида иштирок этмаган. Агар жамоа барча мавсумларда қатнашганида, «Персеполис»нинг ушбу кўрсаткичи янада юқори бўлиши эҳтимолдан холи эмас эди.
Остон Ўрунов эса сўнгги ўйинларда ўзининг муҳим голлари билан жамоага катта фойда келтириб келмоқда. Унинг фаол ҳаракатлари «Персеполис» ҳужумига янада ўткирлик бағишлаётгани мухлислар томонидан алоҳида эътироф этилмоқда.
Маълумот ўрнида, бугун «Персеполис» навбатдаги беллашувини ўтказади. Ўзбекистонлик футболчи тўп сураётган жамоа «Алюминиум»га қарши майдонга тушади. Учрашув соат 17:45 да бошланиши режалаштирилган. Мухлислар эса Ўруновдан яна бир ёрқин ўйин ва натижали ҳаракатларни кутиб қолишмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
