Вин Дизел Криштиану Роналду учун “Форсаж”да рол ёзилганини айтди

Криштиану Роналду бу сафар майдондаги ўйини ёки навбатдаги рекорди билан эмас, кино оламига оид хабар билан муҳокама марказига тушди. Голливуд юлдузи Вин Дизел португалиялик футболчи билан тушган суратни эълон қилиб, “Ҳамма ундан ‘Форсаж’да бўладими, деб сўраётганди...

айтишим керак, у зўр. Биз унинг учун рол ёздик”, дея баёнот берди.

Роналду футболчидан кўра каттароқ брендга айлангани аллақачон маълум: беш бор “Олтин тўп”, беш марта Чемпионлар лигаси ғолиби, расмий ўйинларда 900 дан ортиқ гол. Бироқ бундай чўққилардан кейин навбатдаги қадам қандай бўлади, деган савол доим муҳокамада.

2025 йил апрелида Роналду режиссёр ва продюсер Мэттью Вон билан ҳамкорликда URMARV кинокомпанияси ишга туширилганини эълон қилганди. Вон “Пипец” ва Kingsman фильмлари билан танилган.

Студия бор, аммо йирик, тайёр платформага эга лойиҳа зарур. “Форсаж” эса миллиардлаб кассабоп даромад, бутун дунё бўйлаб аудитория ва кенг реклама имкониятларини таклиф қилади.

Франшиза аввал ҳам машҳурларни эпизодик чиқишлар учун таклиф қилиб келган: турли қўшиқчилар ва медиа юлдузлари экранда бир-икки дақиқа кўриниб, томошабинга “ҳақиқатан ҳам у-ку” деган эффектни беради. Бу усул кўпинча ишлайди ва фильмга эътибор ҳам, даромад ҳам ошади.

Аммо Роналду бошқа даража. Унинг ижтимоий тармоқлардаги кузатувчилари сони юзлаб миллионларни ташкил этади, у Лиссабондан Ар-Риёдгача таниладиган глобал шахс.

Кадрларда пайдо бўлишининг ўзи ахборот оқимини кучайтириши, муҳокамаларни кўпайтириши ва футбол оммабоп бўлган ҳудудларда фильмнинг кассасига сезиларли таъсир кўрсатиши мумкин. Шу билан бирга, асосий савол очиқ: бу иштирок шунчаки маркетинг юришими ёки Роналду учун кино соҳасида жиддий бошланишми?

Ҳозирча вазият кўпроқ реклама ёндашувига ўхшайди. Роналду ҳозиргача бундай форматдаги бадиий фильмларда тўлақонли рол ижро этмаган: ҳужжатли фильмлар ва реклама роликлари бор, бироқ актёр сифатида катта тажриба йўқ.

Бироқ “Форсаж” санъат фильми эмас — бу ерда мураккаб психологик ижродан кўра харизма, жисмоний тайёргарлик ва камера олдида ишончли кўриниш муҳимроқ. Бу жиҳатлар бўйича Роналдунинг имконияти етарли экани таъкидланмоқда.

Вин Дизел аввалроқ франшизанинг 11-қисми якуний бўлишини ҳам ишора қилган. Премьера 2027 йил апрелига режалаштирилган.

Жадвал ўзгармаса, Роналду экранда кўриниши эҳтимоли бор: эпизодик рол, бир неча саҳна ёки пойга эпизоди. Катта сюжет юкини олмаслиги мумкин, аммо франшиза тарихида из қолдириш учун бу ҳам етарли.

Қизиқ томони, Дизел постидан кейин хабар кенг тарқалди, ОАВ уни тезда кўпайтирди. Орадан вақт ўтиб актёр эълонни таҳрирлаб, Роналдунинг айнан қаерда пайдо бўлиши ҳақидаги аниқ ишорани олиб ташлаган.

Бу одатий усул: қизиқишни ёқиш учун етарлича айтиш, бироқ мажбуриятни қатъийлаштириб қўймаслик. Мухлислар муносабатини ҳам тахмин қилиш қийин эмас.

Бир тараф буни ажойиб маркетинг деб баҳолаб, фильмни интиқлик билан кутади. Бошқалар эса франшизадан “сўнгги ресурсни ҳам сиқиб олиш” учун кинога алоқаси йўқ юлдуз жалб қилинаётганини айтиши мумкин.

Яна бир гуруҳ эса 2009 йилда Los Bandoleros қисқа метражли фильмида (у “Форсаж 4”га преквел сифатида ишланган) Роналду учун рол ёзилгани, аммо у экранда кўринмагани ҳақидаги эски воқеани эслатади: нега бу сафар бошқача бўлиши керак? Роналду фаолияти давомида доим “кўпроқ”ни истаган: кўпроқ гол, кўпроқ соврин, кўпроқ таъсир.

Саудия Арабистонидаги босқич эса энди “Реал Мадрид” ёки “Манчестер Юнайтед” давридаги каби чўққи эмас. У 2026 йилги жаҳон чемпионатини ўз фаолиятидаги сўнгги мундиал бўлишини ҳам айтган.

Шундан кейин у қайси йўлни танлайди: мураббийлик, бизнес ёки кинода янги боб? Роналду футболдан кейинги ҳаёти учун империя қурмоқда.

Агар “Форсаж” шу режанинг бир бўлаги бўлса, бу оддий камео эмас, балки янги йўналишга даъво бўлиши ҳам мумкин. Масала шундаки, Голливуд буни қанчалик қабул қилади ва томошабинлар бундай тажрибага қай даражада тайёр.

Ҳозирча кутишдан бошқа чора йўқ. 2027 йил апрелига кўп вақт қолмади.

Агар Роналду ростдан ҳам кадрларда пайдо бўлса, бу франшиза учун ёрқин якуний урғу бўлиши ҳам, юлдуз мақоми ҳар доим ҳам актёрлик маҳоратини англатмаслигини яна бир бор эслатиши ҳам мумкин. “Zamin”ни Telegram'да ўқинг!