“Андижон” жамоаси Ўзбекистон U21 терма жамоасига қарши ўтказилган ўртоқлик учрашувидан сўнг клуб бош мураббийи Самвел Бабаян тайёргарлик жараёни, жамоанинг ҳолати ва олдинда турган муҳим беллашувлар ҳақида фикрларини билдирди.
Тажрибали мураббийнинг таъкидлашича, мазкур ўртоқлик баҳси жамоа учун Осиё Чемпионлар лигасидаги муҳим ўйин олдидан сўнгги текширув вазифасини ўтаган. Чемпионат якунланганидан кейин футболчиларга қисқа дам берилган, 5 декабрдан эса режали тарзда машғулотлар бошланган.
— Албатта, мавсумдан кейин айрим муаммолар бор эди. Жамоада бир нечта жароҳатланган ўйинчилар бўлди, баъзилари тайёргарликка кечроқ қўшилди. Шу сабаб оптимал таркибни тўлиқ шакллантириш қийин кечди. Аммо шу ўйинлар орқали имкониятларимизни кўриб олдик, — деди Бабаян.
Мураббий айниқса футболчиларнинг интизоми ва берилган кўрсатмаларни бажариш даражасидан мамнун эканини алоҳида таъкидлади. Унинг сўзларига кўра, жамоа сўнгги турда “Бунёдкор”га қарши намойиш этган яхши ўйинини ҳам айнан шу руҳда тасдиқлаб берган.
Самвел Вячеславовичнинг маълум қилишича, жамоа эртага Қатарга йўл олади. У ерда тўрт кун давомида машғулотлар ўтказилиб, “Ал-Аҳли”га қарши учрашувга аниқ режа асосида тайёргарлик кўрилади.
— Умуман олганда, тайёргарлик жараёнидан қониқдим. Агар барчамиз ўз ишимизга профессионалларча ёндашиб, бор кучимизни берсак, натижа албатта келади. Йигитлар жисмонан ҳам, руҳан ҳам тайёр, — деди мураббий.
Шунингдек, у жамоа билан вилоят ҳокими Шуҳратбек Қўшоқбоевич учрашиб, футболчиларга қўшимча мотивация берганини ҳам қайд этди. Бу эса жамоадаги умумий руҳни янада кўтарган.
Бабаяннинг сўзларига кўра, 24 декабрь куни бўлиб ўтадиган баҳсга “Андижон” имкони борича тўлиқ ва оптимал таркибда чиқади. Асосий мақсад — муносиб ўйин кўрсатиш, мухлисларни қувонтириш ва ижобий натижа билан юртга қайтиш.
Хулоса қилиб айтганда, “Андижон” жамоаси олдиндаги синовларга жиддий тайёргарлик билан кириб келмоқда ва Қатардаги учрашувда мухлислар умидини оқлашга бел боғлаган.
Меҳмон гуруҳидаги фойдаланувчилар ушбу мақолага изоҳ қолдира олмайди.
