Туркия Суперлигасининг 19-турида “Башакшеҳир” сафарда “Кайсериспор”ни ишончли ва йирик ҳисобда мағлуб этиб, кетма-кет тўртинчи бор ғалаба завқини ҳис қилди. Истанбулликлар бу беллашувда ҳам ўз ўйинини назоратда ушлаб, фурсати келганда рақибни жазолай олди.
Қувонарли томони — “Башакшеҳир” асосий таркибида Ўзбекистон миллий жамоаси вакиллари Элдор Шомуродов ҳамда Аббос Файзуллаев майдонга тушди. Файзуллаев ярим ҳимояда 81 дақиқа жон куйдирган бўлса, Шомуродов учрашувни тўлиқ ўтказди ва энг муҳими — жамоасининг 3-голида ҳал қилувчи пас муаллифи бўлди. Қисқаси, “бизнинг” йигитлар майдонда борлигини яна бир бор исботлади.
Учрашув тақдирига келсак, ҳисоб 35-дақиқада очилди: Зелке пеналтидан аниқ зарба йўллаб, меҳмонларни олдинга олиб чиқди. Иккинчи бўлимда “Башакшеҳир” босимни кучайтирди ва 67-дақиқада Чивелек ҳисобни йириклаштирди. 83-дақиқада эса да Кошта учинчи голни киритиб, баҳсга нуқта қўйди — бу эпизодда Шомуродов ассистент сифатида қайд этилди.
Натижада Нури Шаҳин бошқарувидаги жамоа очколарини 29 тага етказиб, 6-ўриндаги позициясини янада мустаҳкамлади. “Кайсериспор” эса 15 очко билан 16-поғонада қолиб кетди — улар учун вазият ҳали ҳам хавотирли.
Туркия Суперлигаси. 19-тур
Кайсериспор — Башакшеҳир 0:3
24 январ, “Кадир Хас”
Голлар: Зелке (35, пеналти), Чивелек (67), да Кошта (83).
"Башакшеҳир": Шенгезер, Шаҳинер (Булут, 46), Дуарте, Опоку, Опери, Кемен, Гунеш (Эргун, 81), Файзуллаев (Йилдирим, 81), Ҳарит (Брнич, 88), Шомуродов, Зелке (да Кошта, 69).
“Zamin”ни Telegram'да ўқинг!
