Лиссабоннинг “Бенфика” клуби бош мураббийи Жозе Моуринью Чемпионлар лигаси доирасида “Реал”га қарши жавоб ўйини олдидан журналистлар билан учрашувга чиқмади. Португалия матбуоти бу қарорни “навбатдаги сукут” деб баҳоламоқда.
Қизиғи, бу мавсумда Моуринью матбуот анжуманини ўтказиб юборган ҳолатлар сони 10 тага етгани айтилмоқда. Клуб матбуот хизматига кўра, бу сафар ОАВ саволларига Жозенинг ёрдамчиси Жоау Тральяу жавоб беради.
Мадриддаги жавоб баҳси олдидан “Бенфика” учун вазият шундоқ ҳам таранг. Эслатиб ўтамиз, биринчи ўйинда (0:1) Моуринью ҳакам билан тортишувдан кейин қизил карточка олгани сабабли, “Сантьяго Бернабеу”да захира ўриндиғида бўла олмайди ва жамоани тўғридан-тўғри бошқариш ҳуқуқидан маҳрум.
Бунга қўшимча равишда, жавоб ўйини олдидан “Бенфика” ҳужум чизиғи ҳам зарба еяпти: УЕФА Винисиус Жуниор билан боғлиқ можаро ортидан Джанлука Престианнини вақтинча (бир ўйин) четлатгани ҳақида қарор чиқарди. Бу қарор шу пайтнинг ўзидаёқ жамоанинг ҳужум имкониятларини сезиларли камайтириши мумкин.
Энди энг асосий савол: Моуриньюнинг сукути ва майдон четида йўқлиги, устига-устак Престианнисиз қолган “Бенфика” Мадридда қандай реакция кўрсатади? Чоршанба куни “Бернабеу”да ҳақиқий “жанг” кутиляпти — ва бу жангда ҳар бир детал, ҳатто матбуот анжуманига чиқмаслик ҳам, психологик фонни ўзгартиради.
“Zamin”ни Telegram'да ўқинг!
