Ордос татамисида ўзбекистонлик дзюдочилар медалларга эга бўлди

Хитойнинг Ордос шаҳрида ўтаётган дзюдо бўйича катталар ўртасидаги Осиё чемпионатининг иккинчи кун беллашувлари ўз ниҳоясига етди. Ушбу кун Ўзбекистон терма жамоаси учун муваффақиятли ўтди — спортчиларимиз яна медаллар жамғармасини бойитишга эришди.

Мусобақанинг иккинчи куни якунига кўра, юртимиз вакиллари 1 та кумуш ва 1 та бронза медалига сазовор бўлишди. Айниқса, -70 кг вазн тоифасида юртимиз номини ҳимоя қилган Ширинжон Йўлдошева алоҳида эътиборга лойиқ чиқиш қилди. У қўлидаги жароҳатга қарамасдан финал баҳсида татамига чиқиб, охиригача курашди ва натижада кумуш медални қўлга киритди. Бу унинг матонати ва иродасини яна бир бор намоён қилди.

Шу вазнда яна бир вакиламиз Хуршида Раззоқбердиева ҳам муносиб иштирок этди. У ярим финалда айнан Йўлдошевага имкониятни бой берган бўлса-да, бронза учун беллашувда ўзини қўлга олиб, Хитой Тайпейи спортчиси Ю-Жунг Лиаодан устун келди ва учинчи ўринни эгаллади.

Шу тариқа, икки кунлик баҳслар якунларига кўра Ўзбекистон терма жамоаси умумий ҳисобда 3 та кумуш ва 2 та бронза медалга эга бўлиб турибди. Бу натижа жамоанинг мусобақада барқарор ва ишончли иштирок этаётганини кўрсатмоқда.

Кумуш медаллар:
-48 кг: Лазиза Ҳайдарова
-52 кг: Сита Кадамбаева
-70 кг: Ширинжон Йўлдошева

Бронза медаллар:
-60 кг: Самариддин Қўчқоров
-70 кг: Хуршида Раззоқбердиева

Қайд этиш жоиз, эртага мусобақада оғир вазн тоифаларидаги дзюдочилар татамига чиқади. Айнан шу йўналишда ҳам юртимиз вакилларидан янги медаллар кутилаяпти. Мухлислар эса навбатдаги баҳсларда ҳам ғалабалар давом этишига умид қилмоқда.