“Манчестер Сити” бош мураббийи Хосеп Гвардиола клуб келажаги ва ўз ўрнини ким эгаллаши мумкинлиги ҳақида фикр билдирди. Унинг сўзлари футбол жамоатчилигида катта қизиқиш уйғотди.
Гвардиола таъкидлашича, у бир неча йил аввалёқ ёш мураббий Венсан Компанига эътибор қаратган. У “Бёрнли”га қарши ўйинлардан биридаёқ Компанининг салоҳиятини сезганини айтган:
“Ўшандаёқ менда шундай ҳис бор эди — бу йигит бир кун келиб топ-клубни бошқаради”, дея қайд этди мутахассис.
Бироқ Гвардиола фикрича, Компани ҳозир ҳали мураббийлик йўлида шаклланиш босқичида турибди. У “Бавария”да эндигина икки мавсум ишлагани сабабли тажриба тўплашда давом этмоқда:
"Аммо у ҳали ёш, «Бавария»да эндигина икки мавсум ишлади, шунинг учун у ерда яна бироз вақт фаолият олиб боради, - деди Гвардиола.
Испаниялик мураббий шунингдек, агар келажакда Компани ва “Бавария” йўллари ажраса, у яна Англияга қайтиш эҳтимоли юқори эканини айтди:
"Менда шундай ҳиссиёт бор: агар бир кун келиб Компани ва «Бавария» йўллари ажралса, у Англияга қайтишни истайди", - деди Гвардиола.
Гвардиола унинг футбол фалсафаси ва етакчилик сифатларини юқори баҳолаб, “Манчестер Сити” ҳар доим Компани юрагида қолишини таъкидлади. У ҳатто бир кун келиб бельгиялик мураббий яна Манчестерга қайтиши мумкинлигини ҳам истисно қилмади:
"Ишончим комил, «Манчестер Сити» доим унинг юрагида бўлади ва умид қиламанки, бир кун у яна бу клубга қайтади", — деди Гвардиола.
Ҳозирда Венсан Компани “Бавария”ни бошқариб, жамоа билан барқарор натижалар қайд этмоқда. Унинг немис клуби билан амалдаги шартномаси 2029 йилгача давом этади.
“Zamin”ни Telegram'да ўқинг!
