Василиже Костов жорий мавсумда 21 та голли вазиятда иштирок этди

Сербия футболида янги юлдуз порламоқда. «Црвена звезда» академияси тарбияланувчиси, 17 ёшли ҳужумкор ярим ҳимоячи Василиже Костов ўзининг сермаҳсул ўйини билан Европанинг энг кучли клублари назарига тушди. Жорий мавсумда у катталар даражасидаги дебютини ўтказиб, гол ва ассистлар сонини 21 тага етказди. Унинг иқтидори «Арсенал», «Барселона» ва «Бавария» каби жамоаларни қизиқтириб қўйди. Бу ҳақда Goal.com хабар беради.

Костов 2008 йил май ойида Белградда туғилган ва етти ёшидан буён «Црвена звезда» тизимида тўп суради. У 15 ёшидаёқ 17 ёшгача бўлган жамоада 20 та голда иштирок этиб, мутахассислар эътиборини қозонган эди. Айниқса, «Партизан»га қарши кечган «Абадий дерби» баҳсларида киритган голлари уни мухлисларнинг севимлисига айлантирди. 2025 йил апрель ойида у Сербия Суперлигасида дебют қилди.

Ҳозирда жамоани бошқараётган афсонавий Дежан Станковиc қўл остида Костов янада ўсишга эришди. У майдонда асосан «ўнинчи рақам» вазифасини бажаради ва ўйин услуби билан кўпроқ Искони эслатиб юборади. Футболчи февраль ва март ойлари оралиғида олтита ўйинда олтита гол уриб, ўзининг динамик ҳаракатлари билан жамоасининг асосий етакчисига айланди.

Собиқ бош мураббий Владан Миложевиc ёш иқтидорнинг ишга бўлган муносабатини юқори баҳолади. Унинг таъкидлашича, Костов мураббийлар кўрсатмасига амал қилиши ва ўз устида тинимсиз ишлаши билан ажралиб туради. Гарчи футболчи ҳимоявий ҳаракатларда бироз оқсаса-да, унинг техникаси ва майдонни кўриш қобилияти келажакда жаҳон даражасидаги юлдуз бўлишидан далолат бермоқда.