Берлинда ўзбек дзюдочилари порлади: умумжамоа ҳисобида биринчи ўрин...
Германиянинг Берлин шаҳрида ўтказилган нуфузли халқаро турнирда Ўзбекистон ўсмирлар терма жамоаси 35 давлат орасида умумжамоа ҳисобида фахрли биринчи ўринни эгаллади. Аурелиан-Чиприан Флис бошчилигидаги дзюдочиларимиз 4 та олтин, 2 та кумуш ва 5 та бронза медалларини қўлга киритиб, Франция, Озарбайжон ва Германия каби кучли жамоаларни ортда қолдиришди. Ушбу муваффақият ўзбек дзюдо мактабининг янги авлоди халқаро майдонда юксак салоҳиятга эга эканини ва тизимли тайёргарлик ўз мевасини бераётганини яна бир бор исботлади.
Германиянинг Берлин шаҳрида икки кун давомида ўсмирлар ўртасидаги нуфузли халқаро мусобақа — Berlin Millennium Team Cadet European Cup 2026 турнири бўлиб ўтди. Ушбу йирик стартда Ўзбекистон терма жамоаси яна бир бор ўз кучини намоён қилди.
Аурелиан-Чиприан Флис бошчилигидаги кадетларимиз кучли рақобат шароитига қарамай, ажойиб натижа қайд этишди. Жамоа 4 та олтин, 2 та кумуш ва 5 та бронза медалини қўлга киритиб, 35 давлат орасида умумжамоа ҳисобида 1-ўринни эгаллади.
Энг эътиборли жиҳати — дзюдо анъаналари кучли бўлган Франция, Озарбайжон, Туркия, Италия, Германия ва Грузия каби давлатлар ортда қолдирилди. Берлин аренасида Ўзбекистон давлат мадҳияси 4 бор янграгани эса бу ғалабанинг қанчалик йирик эканини кўрсатади.
Финал беллашувларини Ўзбекистоннинг Германиядаги фавқулодда ва мухтор элчиси Дилшод Аҳатов ҳам бевосита кузатиб боргани ушбу мусобақанинг аҳамиятини янада оширди.
Эслатиб ўтиш жоиз, шу йил март ойида Туркиянинг Анталия шаҳрида бўлиб ўтган шу турнир босқичида ҳам ўсмирларимиз 12 та медал қўлга киритган эди. Берлинда чемпион бўлган Чарос Ҳикматова ўша мусобақада ҳам олтин медал соҳибаси бўлганди.
Албатта, бу натижалар тасодиф эмас. Уларнинг ортида мураббийлар штаби, хусусан Аурелиан-Чиприан Флис раҳбарлигидаги тизимли иш турибди.
Қисқача айтганда, янги авлод “жиддий сигнал берди” — Европа саҳнасида ҳам энди улар билан ҳисоблашишга тўғри келади.
Изоҳлар 0
…