Италия А Сериясининг навбатдаги турида "Рома" ўз майдонида "Пиза" жамоасини қабул қилди. Учрашув римликларнинг 3:0 ҳисобидаги ишончли ғалабаси билан якунланди. Бу ҳақда Goal.com хабар беради.
Ўйин қаҳрамонига айланган нидерландиялик ҳужумчи Донелл Мален рақиб дарвозасига учта гол уриб, хет-трик қайд этди.
Мален ҳисобни учрашувнинг 3-дақиқасида очишга муваффақ бўлди. Биринчи бўлим якунланиши арафасида у Девайн Реншнинг узатмасидан сўнг дублини нишонлади.
Танаффусдан сўнг Матиас Соуле томонидан етказиб берилган тўпни дарвозага жойлаган ҳужумчи ўзининг учинчи голини урди.
Ҳозирда Мален "Рома" сафида 14 та ўйинда майдонга тушиб, 11 та гол уришга эришди. У А Серия тўпурарлари рўйхатида 10 та гол билан учинчи ўринда бормоқда.
Ундан фақат Лаутаро Мартинес (16 гол) ва Анастасиос Дувикас (11 гол) олдинда жойлашган.
Эслатиб ўтамиз, Мален январь ойида "Астон Вилла"дан ижара асосида Рим клубига ўтган эди. Агар "Рома" мавсум якунида Еврокубокларга йўлланма олса, футболчини 25 миллион евро эвазига сотиб олиш ҳуқуқига эга бўлади.
Ҳужумчи Нидерландия терма жамоаси сафида ҳам фаол иштирок этиб, 51 та ўйинда 13 та гол урган.
“Zamin”ни Telegram'да ўқинг!
