Пари Сен-Жермен Чемпионлар лигаси ярим финалида Бавария устидан умумий 6:5 ҳисобида ғалаба қозониб, кетма-кет иккинчи бор финал йўлланмасини қўлга киритди. Мюнхендаги жавоб учрашуви Париждаги каби сермаҳсул бўлмаган бўлса-да, Луис Энрике шогирдлари ўз ўйинлари билан мухлисларни яна бир бор ҳайратда қолдиришди. Учрашувнинг учинчи дақиқасидаёқ Хвича Кваратсхелиа томонидан узатилган тўпни Усман Дембеле дарвозага жойлаб, жамоасига муҳим устунликни тақдим этди. Бу ҳақда Goal.com хабар беради.
Хвича Кваратсхелиа жорий мавсумда чинакамига етакчига айланди. Грузиялик футболчи Чемпионлар лигаси плей-офф босқичида кетма-кет етти ўйинда гол ёки ассист қайд этган тарихдаги илк футболчига айланди. У нафақат ҳужумда, балки ҳимояда ҳам фаол ҳаракат қилиб, жамоасига катта ёрдам бермоқда. Айнан унинг ўйини финалда Арсенал ҳимоячилари учун энг жиддий синов бўлиши кутилмоқда.
Бавария сафида Майкл Олисе ўзининг техникаси билан ажралиб турди. У Нуно Мендесга қарши курашларда устунлик қилиб, рақиб ҳимоясини бир неча бор саросимага солди. Бироқ, Гарри Кейн ва унинг жамоадошлари ўйин охирида ҳисобни қисқартиришган бўлса-да, бу уларнинг финалга чиқиши учун етарли бўлмади. Эндиликда PSJ Будапештда бўлиб ўтадиган финалда Арсенал билан тўқнаш келади.
“Zamin”ни Telegram'да ўқинг!
