Реал Мадрид кетма-кет икки мавсумни йирик совринларсиз якунлагани Килиан Мбаппе трансфери атрофида жиддий саволларни келтириб чиқарди. Франциялик ҳужумчининг эркин агент сифатида жамоага келиши янги "Галактикос" даврини бошлаши кутилган эди, бироқ бу трансфер тактик номутаносиблик ва кийим алмаштириш хонасидаги келишмовчиликларга сабаб бўлди. Бу ҳақда Goal.com хабар беради.
ЭСПН хабарига кўра, клуб раҳбарияти Мбаппе трансфери тўғри қарор бўлганми деган саволни ўртага ташламоқда. Винисиус Жуниор жамоанинг асосий юлдузи бўлиб турган бир пайтда, Мбаппенинг келиши таркибдаги мувозанатни бузди. Карло Анселотти, Хаби Алонсо ва Альваро Арбелоа каби мураббийлар Мбаппе, Винисиус ва Жуд Беллингемни бир вақтнинг ўзида самарали ишлатиш тизимини топа олишмади.
Мбаппенинг Чемпионлар лигасидаги статистикаси ҳам кутилганидан пастроқ бўлмоқда. У "қироллик клуби" сафида ўтказган 25 та ўйиндан 10 тасида мағлубият қайд этилди. Шунингдек, жароҳатлар туфайли Манчестер Сити ва Барселона каби муҳим баҳсларни ўтказиб юбориши ҳамда унинг майдон ташқарисидаги хатти-ҳаракатлари мухлислар ва мутахассислар томонидан кескин танқид қилинмоқда.
Клуб ичидаги манбалар франциялик юлдуз ва мураббийлар штаби ўртасида зиддиятлар борлигини таъкидлашмоқда. Эндиликда Мбаппе келаси мавсумда ўз ўрнини сақлаб қолиш учун мисли кўрилмаган босим остида ҳаракат қилиши ва жамоа муваффақиятига ўз ҳиссасини қўшиши талаб этилади.
“Zamin”ни Telegram'да ўқинг!
