Лаурен Ҳемп Барселона таклифини рад этиб Манчестер Сити билан ғолиб бўлди

Икки йил аввал Лаурен Ҳемпнинг Манчестер Сити билан шартномаси якунланишига оз қолганида, унинг жамоани тарк этиши ҳақиқатга яқин эди. Барселона клуби Англия терма жамоаси юлдузи билан жиддий қизиқаётган эди ва 17 ёшида клубга келиб, Европанинг энг яхши вингерларидан бирига айланган футболчини сақлаб қолиш учун Манчестер Сити жамоасида вақт кам қолаётган эди. Бироқ якунда Ҳемп қолишга қарор қилди ва бугун у Аёллар Суперлигаси чемпиони сифатида бу қароридан жуда бахтли эканини таъкидламоқда. Бу ҳақда Goal.com хабар беради.

Ҳемп 2018-йилдан бери Манчестер Сити сафида тўп суриб келмоқда. У жамоа билан Англия кубоги ва Лига кубогини қўлга киритган бўлса-да, бир неча бор чемпионлик пойгаларида мағлуб бўлган ва Чемпионлар лигаси баҳсларини эрта тарк этишга мажбур бўлган эди. "Янги шартнома имзолаш ҳақида ўйлаётганимда, айнан шу клуб билан ғалаба қозонишни хоҳлаётганимни билардим. Охирги пайтларда совринлар кам бўлгани учун хаёлимда доим 'мен ғалаба қозонишим ва совринлар ютишим керак' деган фикр турарди", — деб эслайди футболчи.

Ҳемп ўз жамоасига ишонишда давом этди: "Мен клубга ишондим, шунинг учун ҳам қолдим. Чунки яқин келажакда биз рақобатлашиб, совринлар юта олишимизни билардим". Шу ойнинг бошида ушбу орзу ушалди ва Манчестер Сити 2016-йилдан бери илк бор Суперлига чемпионлигини қўлга киритди. "Қароримдан фахрланаман. Қолганимдан ва чемпионлик учун ҳамма қатори қаттиқ меҳнат қилганимдан жуда хурсандман", — дея қўшимча қилди у.

25 ёшли футболчи бу муваффақиятни шунчаки "бошланиши" деб ҳисобламоқда. Якшанба куни у жамоадошлари билан биргаликда олти йиллик танаффусдан сўнг Англия кубогини қўлга киритиш учун Брайтон жамоасига қарши майдонга тушади. Ҳемп Уембли стадионидаги финалларда бой тажрибага эга ва у Манчестер Сити жамоасининг янги ғалабалар даврини бошлаб беришига ишонмоқда.