Мессидан Лопетеги учун навбатдаги туҳфа

Аргентиналик ҳужумчи «Севилья»га қарши учрашувда олган жароҳати туфайли уч ҳафтани майдондан ташқарида ўтказади. Шу сабабли у кейинги ҳафта бўлиб ўтадиган «Реал»га қарши дербини ҳам ўтказиб юборади.

Хулен Лопетеги учун бу вазият чиқиш йўли бўлиши мумкин. Лопетеги сўнгги ҳафталарда «қора кунлар»ни бошидан кечирмоқда. Унинг жамоаси яратилган вазиятларни голга айлантира олмаяпти, етакчи футболчилар жароҳат олган, бутун дунё унга қарши.

Аммо у якшанбага қадар клуб бошқарувида қоладиган бўлса Мессининг йўқлиги 52 ёшли мураббийга ҳаётда қолиш учун ажойиб имконият бўлиши мумкин. Чунки «Барселона» бир кишидан иборат жамоа бўлмасада, Мессисиз клубнинг аҳволи анча қийинлашиб қолади.

«Севилья»га қарши ўйинда ҳам бунинг гувоҳига айландик. Пабло Мачин шогирдлари Месси жароҳат олгунича икки гол ҳисобида ортда қолаётганди. Аргентиналик даҳо дастлаб Филиппе Коутиньога ассистентлик қилган бўлса, иккинчи голга ўзи муаллифлик қилиб қўя қолди. У ўйинни эрта тугатганидан кейин рақиб жамоа штурмни кучайтирди ва икки гол уришга ҳам эришишди. Аммо бу якунда ғалабага олиб келмади.

«У ҳаммасини қилиб бўлганди. 15 минут ичида у ўйин тақдирини ҳал қилиб бўлганди» – деди Мачин ўйиндан кейин Месси ҳақида гапираркан.

Мессисиз қолган каталонияликларни эса германиялик дарвозабон Марк-Андре Тер Штеген қутқариб қолди. У икки марта дубл сейвни амалга ошириб мухлисларнинг олқишига сазовор бўлди. Гарчи ғалабани ушлаб қолган бўлсада, Мессисиз қолган «Барса» ўзгача ўйин намойиш қилди.

«Биз озгина концентрацияни йўқотдик» – деди Эрнесто Валверде. «Уни соғинамиз, аммо бизда бошқа ресурслар ҳам бор.»

Мессисиз қолган жамоага қарши мадридликлар яхшироқ имкониятга эга бўлишлари аниқ. Албатта бу «Реал» ғалаба қозонади дегани эмас. 2015-йилги «Эл Классико»да ҳам Лео захирада қолиб кетганди. Аммо Рафа Бенитес шогирдлари якунда азалий рақибларига ўз уйида 4-0 ҳисобида ютқазганди.

Бироқ ўшанда Неймар ва ўзининг юқори спорт формасида бўлган Луис Суарес бор эди. Ўша «Барса» ҳозиргисидан анча кучлироқ эди. Гарчи бу сафар Месси бўлмасада «Севилья», «ЦСКА», «Алавес» ва «Леванте»га ютқазишга улгурган «Реал» ҳам ўз спорт формасида эмас.

Лопетеги эса борган сари кучлироқ босим остида қолмоқда. Бироқ у ўз шогирдлари далдасига суянаши мумкин. Рамос «Леванте»га ютқазганидан кейин «Хулен барча футболчиларнинг қўллаб-қувватловига суяниши мумкин. Биз сешанба куни «Виктория Пльзен»ни ютишимиз шарт. Шундан кейингина «Эл Классико» ҳақида ўйлаймиз» – деди.

Клуб президенти Флорентино Перес жамоаси «Леванте»га 2-0 ҳисобида ютқазаётган вақтида асабий ўтирди ва ўйиндан сўнг кийиниш хонасига ташриф буюрган ва Лопетеги билан алоҳида суҳбатлашиб олган.

Ҳозирча мураббийнинг жойи хавфсиз бўлиб турибди. «Ишончим комил футбол биза олиб қўйган нарсаларини қайтариб беради» – деди басклик мураббий жамоаси 34 та зарба йўллаганига қарамай атиги битта гол урганига ишора қиларкан. Аммо унинг шогирдлари саккиз соатлик голсиз сериясига ниҳоят барҳам берди.

Испаниянинг собиқ мураббийига қарши ҳамма қарши турган бир пайтда Мессининг йўқлиги унга «туҳфа» бўлиши мумкин. «Реал» ҳам ҳимоя, ҳам гол уриш қобилияти устида қаттиқ ишлаши талаб этилади. Келаси якшанба куни бу «туҳфа»дан Лопетеги нечоғлик фойдалана олади, билиб оламиз.
“Замин” янгиликларини “Инстаграм”да кузатиб боринг