Исроил Мадримов қозоғистонлик боксчига ютқазиб, медалсиз қолди

^{Фото: Ўзбекистон бокс федерацияси}
Бангкокда бокс бўйича Осиё чемпионатининг ярим финали йўлланмаси учун жанглар давом этмоқда.

Ўзбекистонлик боксчилардан бугун биринчи бўлиб Шукуржон Раҳимов (-60 кг) рингга кўтарилди. У туркманистонлик Хурсанд Имонқуловга қарши жанг олиб бориб, ярим финалга чиқди. Иккинчи раундида Раҳимовнинг қоши ёрилгач, ҳакам жангни тўхтатди; бунга қадар устунликка эга бўлган Раҳимов очколар ҳисобига кўра ғолиб деб топилди.

Ўзбекистон терма жамоаси етакчиси Исроил Мадримов эса (-75 кг) иккинчи жангида ютқазиб қўйди. Уч кун олдин вьетнамлик боксчини қийинчиликсиз таслим этган Исроил чорак финалда қозоғистонлик Турсунбай Кулахметга қарши рингга чиқиб, очколар ҳисобида имкониятни бой берди.

^{Фото: Ўзбекистон бокс федерацияси}
23 апрель кунги баҳсларда ўзбекистонлик яна 6 боксчи жанг ўтказади.

Кундузги дастур:
-91 кг: Санжар Турсунов – Чингиз Борбашев (Қирғизистон)
-60 кг: Райҳона Қодирова – Намуун Монхор (Мўғулистон)
-75 кг: Мавлуда Мавлонова – Веи-Сиен Лин (Хитой Тайпейи)

Кечки дастур:
-69 кг: Бобо Усмон Батуров – Асланбек Шимбергенов (Қозоғистон)
+91 кг: Баҳодир Жалолов – Хаипенг Му (Хитой)
-64 кг: Мафтуна Мелиева – Сучада Панич (Таиланд).

Эслатиб ўтамиз, кечаги баҳсларда ўзбекистонлик 4 нафар боксчи ярим финал йўлланмасини қўлга киритган бўлса, жамоанинг яна 4 нафар вакили, жумладан Ҳасанбой Дўсматов ҳам мағлубиятга учраб, мусобақани эрта якунлаган эди. “Замин” янгиликларини “Youtube”да кузатиб боринг