Google ва Gucci 2027 йилда AI кўзойнакларини чиқаради
Google ва Gucci компаниялари 2027 йилга қадар сунъий интеллектга асосланган ақлли кўзойнаклар чиқариш бўйича ҳамкорлик қилишини эълон қилди. Ушбу маҳсулот бозорда Meta ва Ray-Ban каби йирик рақобатчиларга қарши кузатилади. Google учун бу ташаббус кийиладиган технологиялар бозорига қайта киришнинг навбатдаги уринишидир. Экспертларнинг фикрича, Gucci билан ҳамкорлик маҳсулотнинг нафақат технологик, балки услубий жиҳатдан ҳам жозибадор бўлишини таъминлайди.
Люкс мода уйи "Gucci" 2027 йилга қадар "Google" билан ҳамкорликда AI технологиясига асосланган ақлли кўзойнакларни чиқариш режалари ҳақида эълон қилди. Ушбу қадам йирик люкс бренднинг сунъий интеллект кўзойнаклари бозорига илк бор кириб келишини англатади ва маҳсулотни "EssilorLuxottica" ҳамда "Meta" томонидан ишлаб чиқилган "Ray-Ban" ақлли кўзойнакларига бевосита рақобатчи сифатида жойлаштиради. Бу ҳақда 3dnews.ru хабар беради.
Ушбу ташаббус "Google"нинг ўн йил олдин "Google Glass" муваффақиятсизлигидан кейин кийиладиган кўзойнаклар бозорига киришга бўлган иккинчи уринишидир. Шунингдек, компания жорий йилнинг охирроғида ҳозирда "Project Aura" деб номланувчи биринчи Android XR асосидаги кўзойнакларини чиқариши кутилмоқда.
Саноат таҳлилчилари ақлли кўзойнакларнинг оммалашуви учун услуб жуда муҳимлигини таъкидламоқдалар. Гарчи "Google" илгари "Warby Parker" ва "Gentle Monster" каби брендлар билан ҳамкорлик қилган бўлса-да, "Gucci" билан ҳамкорлик "Meta" билан рақобатлашиш учун зарур бўлган нуфузни таъминлайди. "Snap" бош директори Эван Спигель мода брендлари билан ҳамкорлик қилиш технология компанияларига таниқли номлардан фойдаланиш имконини беришини қайд этиб, истеъмолчилар юзларида корпоратив технологик логотипларнинг кўринишини хоҳламаслигини таъкидлади.
Изоҳлар 0
…